Zinama Tumatumae 20:2-9

²Sa tinaṉaziri tanisa baṉara si guana kurumuna sa laione; asa pu va bugoria si ene la pa minate.

³Na vina lavata pa tie sapu pude lopu somana koari na vinaripera, ba doduru tie duviduvili si lopu sana vari tokei.

⁴Na tie hakohako sapu lopu tavete inuma pa totoso, ke pa totoso pakepakete si loketoṉa dogoria.

⁵Sari hiniva tanisa bulo tie si guana lamana peava, ba sa tie gilagilana mo boka siovo vurani.

⁶Soku rina tie va rutia sa tataru loke kokoina; ba avei sa tie sapu boka ta ronu?

⁷Sa tie toṉoto si koa ia sa tinoa sapu loke tinazutuna; mani tamanae sari tuna meke sari dia koburu.

⁸Totoso habotu sa baṉara pude varipitui, si pa matana mo doṉo gilania sa sa kinaleana.

⁹Esei si boka zama guahe, “Ele kopu nia rau sa buloqu pude loke tinazutuqu; ke via si rau meke loke qua sinea?”