Zinama Tumatumae 19:4-17

⁴Na tinagotago si va kamo soku baere, ba sa tie malaṉa si veko pania ri nana baere.

⁵Sa tie va sosode kokoha si kaqu tava kilasa, meke asa pu va vura koha si lopu kaqu govete.

⁶Soku tie si hiva baeri sari na ṉati hiniva, meke doduru tie si na baere tadirini pu varivariponi.

⁷Sa tie malaṉa si ta doṉo palae koari doduru turaṉana, meke gua tugo sari doduru nana baere! Hata luli tugo sa pude zamai, ba lopu ta dogoro sari nana baere.

⁸Asa pu vagi tinumatumae si toka nia sa maqomaqona; asa pu qetu nia sa ginilagilana si koa va leana.

⁹Sa tie va sosode kokoha si kaqu tava kilasa, meke asa pu va vura koha si kote mate.

¹⁰Lopu doṉo pada pude sa tie pekipeki si koa guana tie tagotago, babe pude sa pinausu si baṉara nia sa koburu tavia.

¹¹Na tie gilae si lopu bubugoro; na nana vina lavata sa si pude doṉo pania sa sinea.

¹²Sa tinaṉaziri tanisa baṉara si guana kurumu tanisa laione, ba sa lineana tanisa si guana puni pa duduli.

¹³Sa koburu pekipekina si na tinasuna tanisa tamana, meke sa barikaleqe nominomi si guana honi ruku loke betona pa vetu.

¹⁴Vetu meke poata si na tinago maedi koari tiatamadia ri koburu, ba sa barikaleqe gilaena si mae guana koe Zihova.

¹⁵Na hinakohako si variva puta muliuṉuna, meke sa tie sapu udapelu si va kamo ovia.

¹⁶Asa pu va tabei sari tinarae te Tamasa si lavelave nia sa nana tinoa, ba asa pu kilui si kote mate.

¹⁷Asa pu toka ni sari tie malaṉa si variponi koe Zihova, meke kote pia ia Sa koasa lineana tavetia sa.