Zinama Tumatumae 19:24-28

²⁴Sa tie sapu udapelu si taṉini la pa ginani, ba hakohako si asa pude vala nia sa ginani pa ṉuzuna.

²⁵Sekea sa tie va sisire va kaleana pude gilae sa tie pupuhu, gegesia sa tie bokana balabala ba kote leana mo koasa.

²⁶Asa pu hiko koasa tamana meke hadu vura nia sa tinana si variva kurekurena meke doṉo hikare.

²⁷Tuqu, pana noso va avosi goi sari na tinarae, si kote va seu pule nigo koari na zinama va tumatumae.

²⁸Na tie va sosode kokohana si va sisire nia sa tinoṉoto, meke sa ṉuzu tanisa tie kaleana si onolo kinaleana.