Zinama Tumatumae 19:14-27

¹⁴Vetu meke poata si na tinago maedi koari tiatamadia ri koburu, ba sa barikaleqe gilaena si mae guana koe Zihova.

¹⁵Na hinakohako si variva puta muliuṉuna, meke sa tie sapu udapelu si va kamo ovia.

¹⁶Asa pu va tabei sari tinarae te Tamasa si lavelave nia sa nana tinoa, ba asa pu kilui si kote mate.

¹⁷Asa pu toka ni sari tie malaṉa si variponi koe Zihova, meke kote pia ia Sa koasa lineana tavetia sa.

¹⁸Tarae nia na va toṉotia sa tumu koreo, vasina mo koa sa hinarupu, be lopu gua si kote vari tokae si goi koasa nana minate.

¹⁹Sa tie bubugoro haru si kaqu vagia sa laena, pana harupia goi, si kaqu harupu pilipule ia tugo goi.

²⁰Avosi sari na vina balau mamu va tabei sari na tinarae, meke pa vina betona si kote gilae si goi.

²¹Soku sari na hiniva pa bulona sa tie, ba sa hiniva te Zihova si kote gorevura.

²²Sapu okoro nia sa tie si na tataru nabuna, leana si be malaṉa ba lopu na tie kokoha.

²³Sa pinamaṉana e Zihova si variva toa; kote koa va leana sa tie, meke tava leseve pa tinasuna.

²⁴Sa tie sapu udapelu si taṉini la pa ginani, ba hakohako si asa pude vala nia sa ginani pa ṉuzuna.

²⁵Sekea sa tie va sisire va kaleana pude gilae sa tie pupuhu, gegesia sa tie bokana balabala ba kote leana mo koasa.

²⁶Asa pu hiko koasa tamana meke hadu vura nia sa tinana si variva kurekurena meke doṉo hikare.

²⁷Tuqu, pana noso va avosi goi sari na tinarae, si kote va seu pule nigo koari na zinama va tumatumae.