Zinama Tumatumae 18:6-23

⁶Na beru tanisa tie duviduvili si va kamo pule nia tinasuna sa, meke sa ṉuzuna si ta seke nia sa.

⁷Sa ṉuzuna sa tie pekipeki va kamoa sa nana tinahuara, meke sa beruna sa si na sipata tanisa.

⁸Sari zinama nanae si guana ginani lomosodi, ta onolo gore kamo la pa korapa tinina sa tie.

⁹Asa pu malohoro pa nana tinavete si na tasina sa tie huhuara.

¹⁰Sa pozana e Zihova si na vetu ululuna na ṉiṉirana, saripu toṉoto si haqala la vasina pude tome koari kana.

¹¹Sa tie tagotago si hiva ta harupu koari nana tinagotago; balabala guni nia sa na goba sapu lopu boka ta haele.

¹²Sipu lopu ele hoqa sa si vahesi pule nia pa bulona, ba vina pepekae si kekenu meke tiqe sa vina lavata.

¹³Pude olaṉa va kenue sipu lopu ele va avoso si na dinuviduvili meke variva kurekure.

¹⁴Sa maqomaqona sa tie si toka nia si asa totoso moho, ba esei kote boka ia sa maqomaqo sapu malohoro gore?

¹⁵Sa bulona sa tie balabala valeana si kote vagi vina tumatumae; sari taliṉana sa tie gilaena si hata vura nia sa ginilagilana.

¹⁶Na vinariponi tukelia sa siraṉa tanisa tie variponi, meke turaṉa la nia si asa pa kenudi ri na tie nomadi.

¹⁷Sa tie kekenu pude zama nia sa ginugua si doṉo guana toṉotona, osolae kamo tu si keke pule meke nananasia si asa.

¹⁸Na mudumudukeda boka va nosoa sa vinari tokei, meke vari seu ni sari karua kalina.

¹⁹Na tasimu koreo sapu bugorona si kote korona variva ta leosae guana vasileana ta gobana, meke na vinari tokei si guana sasada sapu ta roto tukuna.

²⁰Sari vua pa ṉuzuna sa tie si va deṉana sa tiana, saripu paketi sa beruna si leana ni sa.

²¹Sa mea si koa ia ṉiniraṉira pude ponia sa tinoa meke minate, meke arini pu kopu nia si kote hena ia sa vuana.

²²Asa pu dogoro vagia sa nana barikaleqe si vagia si keke ginugua arilaena, meke vagia tugo sa sa minana te Zihova.

²³Na tie malaṉa si tepa ia sa tataru, ba sa tie tagotago si olaṉa va bubugorae.