Zinama Tumatumae 17:8-28

⁸Na tinabara golomo si na tiṉitoṉa arilaena koasa pu tavetia; be pavei si la gua sa ba bokaboka nana.

⁹Asa pu taleoso nia sa sinea si tozi vura nia sa tataru, ba asa pu tavete pulea sa sinea si vari paqaha ni sari na baere soti.

¹⁰Na ginegese si leana la koasa tie pu balabala valeana, hola nia sa sineke keke gogoto totoso pa mudina sa tie pekipeki.

¹¹Sa tie va gugue si hata ia pude va gore ia sa binaṉara; ba na tie variva mate si kote ta garunu la pude va kilasia.

¹²Leana hola si pude tutuvia sa tinadia rina tuna bea, hola nia sa tie duviduvili totoso ilipuṉana sa.

¹³Be lipu nia kinaleana sa tie sa lineana, si sa kinaleana si lopu kaqu taluarae pa nana vetu.

¹⁴Pude podalae varitokei si guana pinodalaena sa naqe, ke va nosoa sa vivinei sipu lopu ele kamo sa vinari velavelai.

¹⁵Pude rupahia sa tie sea meke pusia sa tie toṉoto si lopu leana beto mo koe Zihova.

¹⁶Nasa sa laena sa poata pa limana sa tie pupuhu, sipu loke nana hiniva pude tava tumatumae.

¹⁷Na baere si koa ia tataru doduru totoso, meke sa tasimu si podo pude toka nigo pa totoso tasuna.

¹⁸Na tie lopu tumae balabala mo si va egoa pude tabaria sa gale pana lopu boka si keke, meke vekoa sa si keke nana tinago pude zuka ia sa gale tanisa turaṉana.

¹⁹Asa pu qetu nia sa vinari tokei si qetu nia sa sinea; asa pu zama ni sari nana tinago doduru totoso si tepa tinasuna.

²⁰Sa tie pu boni bulona si lopu koa va leana; asa pu sekesekei meana si hoqa pa tinasuna.

²¹Pude na tie pekipeki sa tumu si variva talotaṉa; loke nana qinetuqetu sa tamana sa koburu duviduvilina.

²²Na bulo qetuqetu si na meresena leana, ba sa maqomaqo talotaṉana si va popa i sari susuri.

²³Na tie kaleana si ade vagi tinabara golomo, pude va sea ia sa hahanana sapu toṉoto.

²⁴Sa tie bakabakala si kopu nia sa ginilagilana pa kenuna, ba sari matana sa tie pekipeki si ene betoa sa kasia popoa pa ninunala.

²⁵Na koburu pekipekina si va kamo tinalotaṉa koasa tamana, meke tinasigiti koasa pu podona.

²⁶Lopu leana si pude va kilasia sa tie toṉoto, babe sekei sari koimata koari na dia tinoṉoto.

²⁷Na tie gilagilana si hoke visavisa nana zinama, meke sa tie gilae si kopu pule nia.

²⁸Ura na tie pekipeki si guana tie gilaena pana noso si asa, meke guana tie balabala va leanana pana lopu kulu si asa.