Zinama Tumatumae 16:3-16

³Veko lani koe Zihova sari doduru tinavete tamugoi, meke kote gorevura sari mua hiniva.

⁴Doduru pu va podaki Sa si pude Tanisa sari laedi rini, sari tie kaleadi ba koa nana dia rane tinahuara.

⁵Zihova si hakohako ni sari bulo pu vahesi puleni, mi tumae nia si hie: ura kaqu tava kilasa si arini.

⁶Pa tataru nabuna meke rinaṉeraṉe si ta leosae sa sinea; pa pinamaṉana e Zihova si lopu ene sea sa tie.

⁷Pana leana sa hahanana tanisa tie koe Zihova, si sari nana kana ba va bulei Sa.

⁸Leana sa tie toṉoto sapu tagotago vasinahite, hola nia sa tago va soku pa sinekesekei.

⁹Pa bulona si tavetia sa tie sa nana inene, ba e Zihova si vizatia sa siraṉa pude enea sa.

¹⁰Sa beruna sa baṉara si zama ni sari inavoso hopedi, nana vinilasa si toṉoto pana vari pitui sa.

¹¹Na sikele toṉotona si mae guana koe Zihova, va pada vekoi Sa sari mamamata pude gotogoto.

¹²Sari baṉara si etuli sari tinavete kaleadi, sina sari binaṉara si tava turu pa tinoṉoto.

¹³Sari baṉara qetuni sari na beru sapu lopu kokoha, va arilaena i rini saripu zama pa hinokara.

¹⁴Na binugoro tanisa baṉara si na inavoso mate, ba na tie gilaena boka va ibu ia mo.

¹⁵Koasa kinomolo pa isumatana sa baṉara si toa sari na tie, pana qetuqetu si asa si guana lei paleke ruku totoso dada.

¹⁶Pude vagi ginilagilana lohina si leana hola nia sa qolo, pude vizatia sa ginilagilana si hola nia sa siliva.