Zinama Tumatumae 16:19-32

¹⁹Leana si pude va pepekae pa maqomaqo meke koa turaṉi saripu ta ṉovala, hola nia pude somana vagi tiṉitoṉa ta hikodi koa rini pu vahesi puleni.

²⁰Asa pu va tabei sari ginarunu si kote toa va leana, meke ta manae tugo sarini pu raṉea se Zihova.

²¹Saripu gilae pa bulodia si ta pozae na tie gilaedi, zinama avoso lea si va lomosia sa tinarae.

²²Ginilagilana si na bukaha tana tinoa koa rini pu tagoa, ba na dinuviduvili si na linipulipu tadi na tie pekipeki.

²³Sa bulona sa tie gilae si turaṉi sari nana zinama, meke sa beruna sa si va arilaena ia sa tinarae.

²⁴Zinama qetuqetu si guana namu zipale, lomoso pa maqomaqo meke salaṉia sa sa tini.

²⁵Koa nana sa siraṉa sapu doṉo guana toṉoto pa tie, ba pa vina betona si kamo la pa minate.

²⁶Na tie si tavetavete pude boka henahena; sa inovia garunu la nia pude tavetavete.

²⁷Sa tie loke laena si tavete binalabala pude ṉoṉovala, meke sari nana zinama si huhuara guana huruṉu nika.

²⁸Sa tie kaleana si va gevugevuru vinari tokei, meke na ninanae si vari luara ni sari baere soti.

²⁹Sa tie varipera si toketoke ia sa turaṉana, meke turaṉa gore nia sa pa siraṉa sapu lopu leana.

³⁰Asa pu matamata puri nia matana si korapa balabala hatai kaiqa kinaleana, meke asa pu garata beruna si korapa la tavete kinaleana.

³¹Na kalu keo si na toropae tolavaena, ta vagi si asa koa rini pu koa va toṉoto.

³²Na tie lopu tuturei bugoro si leana hola nia sa tie varane, asa sapu boka tuqe pule nia si leana hola nia si asa pu rapata vagia sa popoa.