Zinama Tumatumae 14:11-29

¹¹Sa vetu tanisa tie kaleana si kote ta huara, ba sa ipi tanisa tie ṉoṉo si kote turu hola.

¹²Koa nana sa siraṉa sapu doṉo guana toṉoto pa tie, ba pa vina betona si kamo la tu pa minate.

¹³Na hinegere si boka tomea sa tinasigiti pa bulo, meke sipu hola sa qinetuqetu si koa hola sa tinalotaṉa.

¹⁴Sari tie kaleadi si kaqu vagi vuadi sari dia hahanana, meke sa tie leanana si kaqu ta pia.

¹⁵Sa tie sapu lopu goto si hoke va hinokara hoboro mo, ba sa tie gilae si kote vizata va leana koari nana inene.

¹⁶Sa tie gilagilana si pamaṉa nia se Zihova meke kilua sa kinaleana, ba sa tie pekipeki si pupuhu meke sasurae hoboro lamae.

¹⁷Sa tie bubugoro haru si tavete hoboro, meke sa tie sekesekei si ta hakohakoe.

¹⁸Saripu lopu goto si hoke va kamo pupuhu tugo, ba sa tie gilae si toropae nia sa tinumatumae.

¹⁹Sari tie kaleadi si hoke todoṉo ni sari tie leadi, meke sari tie koluradi si tepatepa tinokae koari tie toṉoto.

²⁰Sari tie malaṉa si ta hakohakoe tugo koari turaṉadia, ba sari tie tagotago si soku sari na dia baere.

²¹Asa pu hakohako nia sa turaṉana si sea, ba tamanae si asa pu tataru ni saripu loke gedi.

²²Sarini pu kuhana ni si kaiqa hiniva kaleadi si hoke muliuṉu taloa tugo, ba arini pu balabala pude tavete va leana si kote vagia sa tataru nabuna meke sa sinoto va nabu koe Tamasa.

²³Doduru tinavete mamatadi si koai na lineana, ba sa zama palae si na minalaṉa kamoa.

²⁴Sari na tinagotago tadi na tie gilaedi si na dia toropae baṉara, ba sa dinuviduvili si na pakupaku tadi tie pekipeki.

²⁵Na tie va sosode hinokara si harupu tie, ba sa tie va sosode kokoha si sekesekei.

²⁶Asa pu pamaṉa nia se Zihova, si ta kopue koa Sa, meke sari nana koburu kote boka la tome vasina.

²⁷Na pinamaṉana e Zihova si na bukaha tanisa tinoa, va kekere taloa ia sa tie koasa sipata tanisa minate.

²⁸Na butubutu nomana si na ṉiniraṉira tanisa baṉara, ba pana loketoṉa tie si loke laena mo sa koburu tavia.

²⁹Sa tie sapu lopu bugoro si tagoa sa ginilagilana, ba asa pu bubugoro haru si va vura ia sa nana pinekipeki.