Zinama Tumatumae 12:1-11

¹Asa pu tataru nia sa tinarae pa tinoa si tataru nia sa tinumatumae, ba asa pu hako ta gegese si pekipeki.

²Sa tie leana si ta tokae koe Zihova, ba va kilasi Sa sari tie sekesekei.

³Sa tie si tasuna pude turu va nabu koari na hahanana kaleadi, ba sa tie toṉoto si lopu kaqu ta rabutu palae.

⁴Sa barikaleqe sapu taguena nana hahanana si na toropae binaṉara tanisa nana palabatu, ba sa barikaleqe sapu va kamo kinurekure si guana popozu pa susurina sa palabatu.

⁵Sari hiniva tadi tie toṉoto si gotogoto, ba sari binalabala vari tokae tadi tie kaleadi si na sinekesekei.

⁶Sari zinama tadi na tie kaleadi si variva mate, ba sari na zinama tadi tie toṉoto si variharupi.

⁷Sari tie kaleadi si kamoi tinasuna meke lopu ta dogoro pule, ba sa vetu tadi tie toṉoto si turu va nabu.

⁸Na tie si ta vahesi, luli gua koari nana ginilagilana lohidi, ba sarini pu kaleana dia binalabala si ta hakohakoe.

⁹Leana hola si pude lopu ta gilana ba tago mua nabulu, hola nia pude va sagesage pule nia ba loke gana ginani.

¹⁰Sa tie toṉoto si kopu va leana ni sari nana kurukuru, ba sari tataru tadi tie kaleadi si na ṉinovaṉovala.

¹¹Asa pu tavetavete nia sa nana pepeso si kote soku gana ginani, ba asa pu koa va gulegulea si lopu tumae balabala.