Zinama Tumatumae 11:2-27

²Pana vahesi pule ni sari na tie, si lopu sana mae sa kinurekure, na vina pepekae si lulia na ginilagilana lohina.

³Sa tie toṉoto si ta turaṉa koasa nana kinoa va ṉoṉo, ba na sinekesekei si ṉovalana sa tie kokoha.

⁴Na tinagotago si loke laena totoso tia ia goi sa minate, ba kinoa va leana kote harupigo pa minate.

⁵Sa tinoṉoto tanisa tie sapu loke tinazutuna si turaṉa va leanana si asa, ba sa tie kaleana si tasuna ni sari nana kinaleana.

⁶Sa tinoṉoto tanisa tie ṉoṉona si harupia si asa, ba sa tie lopu ta raṉena si ta sipata koari nana pinuhi.

⁷Pana mate sa tie kaleana, si beto tugo sari doduru nana inoko'okoro; doduru pu hiva ni sa pa nana ṉiniraṉira si loketoṉa mo.

⁸Sa tie toṉoto si ta harupu koari na tinasuna, ta kasie meke raza la tu koari na tie kaleadi.

⁹Koari nana zinama sa tie sapu lopu gilania sa Tamasa si boka ṉovalia sa sa turaṉana, ba pa ginilagilana si boka ta harupu sa tie toṉoto.

¹⁰Totoso koa va leana sari tie toṉoto, si qetu sari pa vasileana, totoso mate sari tie kaleadi si kukili qetuqetu si arini.

¹¹Koari na minana tanisa tie ṉoṉo si ta ovulu sa vasileana, ba koari na zinama tanisa tie kaleana si ta huara sa popoa.

¹²Sa tie pu lopu tumae balabala si zama va gore turaṉana, ba sa tie gilagilana si kopu nia sa sa meana.

¹³Na nanae si hoke tozi vura ginugua tomedi, ba sa tie ta ronuna si kopu ni sari vivinei tadi votiki tie.

¹⁴Pude lopu ta turaṉa, si hoqa tugo sa butubutu, ba pana soku tie si vari tokae pa binalabala si koa sa minataqara.

¹⁵Asa pu va egoa pude hobea sa gale tana keke tie si kaqu kaleana nia tugo sa, ba asa pu korona tabaria sa lipulipu tana votiki tie si gulea nana.

¹⁶Sa barikaleqe pu koa ia tataru bulona si ta pamaṉae, ba sari na tie ṉoṉovala si na tinagotago mo si vagia sa.

¹⁷Sa tie tataru si na lineana si vagia sa, ba sa tie ṉoṉovala si va tinasuna pule nia.

¹⁸Sa tie kaleana si hoke vagi tinabara sapu kokohadi, ba asa pu letea sa tinoṉoto si kaqu paketia sa vua hinokarana.

¹⁹Sa tie sapu turu va nabu pa tinoṉoto si kaqu vagia sa tinoa, ba sa tie sapu luli sari tinavete kaleadi si hata mate.

²⁰E Zihova si etuli na va kari saripu boni bulodi, ba qetu hola ni Sa saripu tavete va leana.

²¹Mi gilana valeania sapu hie: Sari tie kaleadi si kaqu tava kilasa, ba arini pu toṉoto si kaqu ta rupaha.

²²Guana riṉi qolo pa isuna sa boko, sa barikaleqe leleana sapu lopu tumae balabala.

²³Sari inokoro tadi tie toṉoto si hoke gorevura va leana, ba sari rinoverove tadi tie kaleadi si va bugori sari doduru tie.

²⁴Keke tie si tataru meke vari poni, ba va gavoro soku si asa, keke si korokorona poni, si kamoa tu minalaṉa.

²⁵Sa tie sapu variponi, si kote toa va leana meke bokaboka, meke asa pu toka ni sari tie si kote ta tokae tugo.

²⁶Hoke ta levei sa tie pu puhi ni sari ginani, ba ta manae si asa pu va malumu pude holuholu ni.

²⁷Asa pu hata ia pude leana si vagia tugo sa lineana, ba sa tinasuna si kote raza koasa pu hata ia.