Zeŋ 3:10-32

¹⁰Yezu àhi keti : « Nak bay macahi zlam ana ndam *Izireyel ti kə̀sər zlam nday nani do aw ?

¹¹Nəhuk nahəma, ere ye ti leli məɗəmki ma ni ti leli mə̀səra àndava. Ere ye ti leli magrakia sedi a ni ti, leli mìpia àndava. Ay lekʉlʉm ti ni kə̀gəsumkabu ma geli ya məhi ana kʉli ni do.

¹²Tamal lekʉlʉm kə̀gəsumkabu ma goro ya nəhi ana kʉli àki ka zlam ya agravu ka haɗ ni do ni ti, akəgəsumkabu ma goro ya anəhi ana kʉli àki ka zlam ya agravu e melefit bu ni ti ahəmamam ?

¹³Maslaŋa ya ti àcəloya e melefit va ti àbi, si nu *Wur ge Mis, aɗaba nàsləkabiya eslina.

¹⁴Ahaslani a huɗ gili bu ni ti Mʉwiz àvəɗaya gavaŋ ga evirzegena, àfəki ka ahàr ga təndal, àzoru agavəla. Nu Wur ge Mis day si tə̂zoru nu agavəla nahkay kwa.

¹⁵Nahkay ti ku way way do àfəkua ahàr a ti Melefit avi *sifa ya àndav ɗay-ɗay do ni.

¹⁶Nə̀ɗəm nahkay ti aɗaba Melefit àwaya mis ga duniya dal-dal. Nahkay àslərbiyu Wur gayaŋ bəlaŋ bəlaŋani ni, àvi ana tay, ti ku way way do tamal àfəkia ahàr ka Wur na ti èji do, aŋgət sifa ya àndav ɗay-ɗay do ni sawaŋ.

¹⁷Melefit àslərbiyu Wur gayaŋ a duniya vu ti ga məgəs mis ga duniya ni àna seriya do : àslərbiyu naŋ ti ga mahəŋgay mis ga duniya àna naŋ sawaŋ.

¹⁸Maslaŋa ya ti afəki ahàr ka Wur ge Melefit ni ti, Melefit àgəs naŋ àna seriya do. Ay maslaŋa ya àfəki ahàr do ni ti, Melefit àgəsa naŋ àna seriya àndava, aɗaba àfəki ahàr ka Wur ge Melefit bəlaŋ bəlaŋani ni ndo.

¹⁹« Seriya ya Melefit agəs mis àna naŋ ni ti nihi : àslərbiyu Wur gayaŋ a duniya vu ga maslaɗi məlaŋ ana mis, ay mis tàwayay məlaŋ maslaɗani ni ndo, tàwayay manjəhaɗani a məlaŋ ziŋ-ziŋeni bu sawaŋ. Tagray nahkay ti aɗaba tə̀bu tagudar zlam.

²⁰Ku way way do tamal agudar zlam ti àwayay məlaŋ maslaɗani do ; àwayay məhuriyani a huɗ gani vu do daya, aɗaba awayay ti zlam magədavani gayaŋ ni àŋgazlavu ba.

²¹Ay maslaŋa ya ti agray jiri ni awayay məhuriyani a məlaŋ maslaɗani ni vu, aɗaba àgray tʉwi gayaŋ àna njəɗa ge Melefit, nahkay awayay ti tʉwi ni mâŋgazlavu. »

²²Yezu akaba ndam ya taɗəbay naŋ ni tàsləka, tòru ka məlaŋ nahaŋ ka haɗ *Zʉde. Tòru tìnjʉa eslina ti Yezu ànjəhaɗ akaba tay, naŋ àbu *abaray mis.

²³Ka sarta gani nani ti Zeŋ day naŋ àbu abaray mis a Enoŋ kà gəvay ga kəsa Selim. Zeŋ abaray mis eslini ti aɗaba yam àbu dal-dal. Nahkay mis dal-dal tə̀bu tərəkia mək abaray tay.

²⁴Ka gayaŋ nani abaray mis ni ti, tə̀fiyu naŋ a daŋgay vu faŋ ndo.

²⁵Eslini mis ya taɗəbay Zeŋ ni ndahaŋ e kiɗiŋ gatay bu tə̀bu tagray gejewi akaba zal Zʉde nahaŋ àki ke divi ga ndam *Zʉde ya taɗəbay ti tîgi *njəlatani ni.

²⁶Nahkay nday nakəŋ tə̀rəkioru ke Zeŋ, tə̀hi ahkado : « Mʉsi, bay ya a vaɗ nahaŋ àbu lekʉlʉm ata naŋ ke ledi ge Zʉrdeŋ kàgrakia sedia ni ti, nihi ti naŋ àbu abaray mis, mis ɗek tə̀bu tərəkioru. »

²⁷Eslini Zeŋ nakəŋ àhi ana tay ahkado : « Maslaŋa ya ti esliki magray tʉwi àna njəɗa gayaŋ gayaŋani ti àbi, si tamal Melefit àvia njəɗa gana kwa.

²⁸Lekʉlʉm lekʉlʉmeni day kəgrumkua sedi a tata, nə̀ɗəm : “Nu *Krist *Bay gəɗakani ya amara ni do ; Melefit àslərbiyu nu enji gayaŋ ciliŋ.”

²⁹Nəɗəm nahəma, nu ti akaɗa zləba ga bay ya aday wal ni. Maslaŋa ya ti azay wal ni ti wal ni gayaŋ. Ay zləba gayaŋ ni kà gəvay gayaŋ, eci ma gayaŋ ; ècia dəŋgu ga bay ya aday wal na ti amər dal-dal. Nu day nəmər ti nahkay, məmərani gani èslʉva a vu va.

³⁰Ahàr àɗəm njəɗa gayaŋ mâsagakivu, goro ti ni mə̂guloru.

³¹« Bay ya ti àsləkabiya agavəla nahəma, agur mis ɗek. Maslaŋa ya àsləkabiya agavəla do ni ti naŋ ka haɗ, azlapaki day ka zlam ya ka haɗ ni. Bay ya ti àsləkabiya a huɗ melefit ba ni ti agur mis ɗek,

³²agray sedi ga zlam ya èpi akaba èci ni, ay maslaŋa àbi agəskabu pakama gayaŋ ni bi.