Zazi 5:7-14

⁷Debora, sari na vasivasileana nomadi pa Izireli si ta veko palae; osolae mae si goi guana tinana Izireli.

⁸Sipu vahesi rini sari na tamasa vaqura, si ta evaṉa sari na vinaripera nomadi pa popoa meke raza la koari na baradi rina vasileana lavata, meke lopu keke lave babe na hopere si ta dogoro koari ka made ṉavulu puta tina tinoni pa Izireli.

⁹Sa buloqu si somana koari na koimata varipera tadi na tinoni Izireli, meke gua tugo koari na tinoni pu lopu ruritia dia tinoa pa vinaripera. Mi vahesia se Zihova.

¹⁰Gamu na palabatu pu hake koari na doṉ'ki kekeoro, meke gamu na tie tagotago mia pu habotu koari na habohabotuana arilaedi koari na doṉ'ki, meke gamu pu ene pa siraṉa, mi va avoso mae.

¹¹Mamu va avosi sari na tie kerakera koari na berukehe, sapu tozi vurani sari na minataqara te Zihova, sari na minataqara tadi na tinoni Izireli. Meke ene va tokele taluarae gore koari na dia vasileana lavata sari na tinoni te Zihova.

¹²Aria Debora! Aria! Aria! Kerania sa kinera! Aria! Ene la, Beraki tuna koreo e Abinoami, turaṉa taloani sari na mia tie ta raovodi d.

¹³Sari na tie ṉoṉodi si gore mae koa gami na ṉati koimata, meke sari na tie te Zihova si mae koa rau somanae sari na tie varane.

¹⁴Na mae guadi pa butubutu Iparemi vasina koa sari na tie Amaleki pukerane, meke luli mae guadi pa butubutu te Benisimane meke sari nana tinoni si arini. Meke sari na koimata pa vinaripera si gore mae guadi pa butubutu te Manase pa tutina e Maki; meke sari na palabatu nomadi si mae guadi pa butubutu Zeboloni.