Zazi 5:11-25

¹¹Mamu va avosi sari na tie kerakera koari na berukehe, sapu tozi vurani sari na minataqara te Zihova, sari na minataqara tadi na tinoni Izireli. Meke ene va tokele taluarae gore koari na dia vasileana lavata sari na tinoni te Zihova.

¹²Aria Debora! Aria! Aria! Kerania sa kinera! Aria! Ene la, Beraki tuna koreo e Abinoami, turaṉa taloani sari na mia tie ta raovodi d.

¹³Sari na tie ṉoṉodi si gore mae koa gami na ṉati koimata, meke sari na tie te Zihova si mae koa rau somanae sari na tie varane.

¹⁴Na mae guadi pa butubutu Iparemi vasina koa sari na tie Amaleki pukerane, meke luli mae guadi pa butubutu te Benisimane meke sari nana tinoni si arini. Meke sari na koimata pa vinaripera si gore mae guadi pa butubutu te Manase pa tutina e Maki; meke sari na palabatu nomadi si mae guadi pa butubutu Zeboloni.

¹⁵Sari na koimata varipera pa butubutu te Isaka si luli koe Debora; uve, sa butubutu te Isaka meke se Beraki ba mae tugo, meke luli la ia rini si asa pa korapana sa lolomo. Ba sari na tinoni koasa butubutu te Rubeni si paqaha; ura lopu boka vizatia rini pude somana mae.

¹⁶Na vegua ke koa turaṉa hola i rini sari na sipi? Pude avavosi sari na sepati titioki sari na dia rovana sipi? Uve, paqaha sa butubutu te Rubeni meke lopu boka vizatia rini pude mae.

¹⁷Sa butubutu te Qadi si koa pa kali gasa rimata koasa Ovuku Zodani. Meke sari na tinoni pa butubutu te Dani, si koa hola dia kapae koari na vaka. Meke sa butubutu te Asa si koa pa raratana masa tata pa kolo hokara.

¹⁸Ba sari na tinoni pa butubutu te Zeboloni meke Napitalai si lopu ruriti dia tinoa meke somana pa vinaripera.

¹⁹Sari na baṉara si mae meke varipera. Pa totoso asa si varipera sari na baṉara Kenani pa Tanaka tata koasa kolo pa Meqido, ba lopu vagi taloani rini sari na siliva na tinagotago tadi na tinoni Izireli.

²⁰Sipu ene vari karovi sari na pinopino pa galegalearane si varipera si arini. Meke raza ia rini se Sisera.

²¹Meke paleke taloani na naqe pa Ovuku Kisoni si arini, meke kaqu ene varane, ene latu pa ṉiniraṉira si rau!

²²Beto asa si ene hola la sari na hose; puzapuza pa pepeso sari na nenedia.

²³‘Leve nia gana sa vasileana nomana pa Merozi,’ zama gua sa mateana te Zihova. ‘Leveni, leveni gedi sarini pu koa vasina. Na korodia mae toka nia rini se Zihova, mae guari na tie varipera pude toka nia si Asa.’

²⁴Sa barikaleqe tamanaena hola koari na barikaleqe si e Zaeli, sa barikaleqe te Hebere pa Kenaiti. Holani sari na barikaleqe saripu koa koari na ipi.

²⁵Meke sipu tepa kolo napo se Sisera si ponia meleke e Zaeli si asa; meke ponia meleke tugo sa koa keke baolo tolavaena si asa.