Zatù 6:6-30

⁶Nehimu he utew mekehizuhizu is kebpekesavuk te menge Israilihanen tenged te menge Midianhen, umbe mibuyù sikandan te tavang diyà te Nengazen.

⁷Dutun te kedtewaǥa zan te Nengazen,

⁸midsuǥù te Nengazen diyà te kandan is sevaha he ebpeneuven he migkaǥi ziyà te kandan te, “Iyan heini egkeǥiyen te Nengazen he Megbevayà te Israel: ‘Impegawas ku sikiyu ziyà te Ehipto he zutun kew uripena.

⁹Midlibri ku sikiyu te pesipala te menge Ehiptohanen wey te langun he edlisedlised keniyu. Impezaag ku keniyu is menge kuntada niw, ne imbeǥey ku keniyu is menge tanè dan.

¹⁰Migkeǥiyan ku sikiyu he iyan a Nengazen he Megbevayè niw ne kinahanglan he kenè niw ezapa is menge ed-ezapen te menge Amorihanen he iyan kew ǥuntaan nekeilis he ed-ubpà diyà te ed-ubpaan dan. Piru wazà a keniyu pemineǥa.’ ”

¹¹Dutun he timpu nekeuma is belinsuǥuen te Nengazen diyà te Ofra. Mibpinuu sikandin diyà te sihung te kayu he ulayan he ǥaked ni Joash te kevuwazan ni Abiezer. Dutun he timpu si Gideon he anak ni Joash egunas te trigu ziyà te seled te keresà te paras su para kenà maahà te menge Midianhen kes trigu.

¹²Ne mibpaahà ki Gideon is belinsuǥuen te Nengazen ne migkaǥi te, “Sikew is mevurut wey mezesen he etew, duma nu is Nengazen.”

¹³Midtavak si Gideon te, “Datù, emun duma zey is Nengazen ne maan is iring kayi is kebpekesavuk dey? Maan is wazà sikandin mebaal te egkengein-inuwan, iring te mibeelan din dengan hein impeǥawas din puun te Ehipto is menge kepuun dey, sumalà is netudtul zan kenami? Iyan, guntaan mibey-anan key en te Nengazen ne imbeǥey key zin diyà te menge Midianhen.”

¹⁴Ne migkaǥi is Nengazen diyà te kandin te, “Genat ka ne ǥemita nu is tivuuk he zesen nu te kedlibri te menge Israilihanen puun te ǥehem te menge Midianhen. Iyan a midsuǥù kenikew.”

¹⁵Midtavak si Gideon te, “Nengazen, ebmenmenuwen ku te edlibri is menge Israilihanen te iyan kinemeluyahan he pemilya ziyà te tribu ni Manase is kenami he pemilya, ne iyan a kineminusan diyà te pemilya zey.”

¹⁶Migkaǥi is Nengazen te, “Edtevangan ku sikew, ne egkehimu nu te edezaat is menge Midianhen he henduen te ebpekidtebek ke zà te sevaha he etew.”

¹⁷Midtavak si Gideon te, “Emun nekepenunuat a kenikew, ne ipaahà a kenikew te tuus he tutuu he iyan ka midsuǥù kedì.

¹⁸Ne kenè ka zèpa genat su ebpemuhaten ku sikew.” Ne midtavak is Nengazen te, “Edteǥazan ku sikew.”

¹⁹Mid-ulì si Gideon ne midhilutù sikandin te nati he kambing, wey mibaal te supas he wazè din tapey he tengà te saku he harina. Ne hein ingketaǥù din en te baskit sikan is usa wey ingketaǥù din en diyà te kuzen is savew kayi, ne mid-uwit din haazà is keenen diyà te velinsuǥuen te Nengazen he ziyà te sihung te kayu he ulayan.

²⁰Ne migkaǥi haazà is belinsuǥuen te Megbevayà te, “Iuntud nu is usa wey supas kayi te vatu, ne vusbusi nu te savew.” Ne mibeelan haazà ni Gideon.

²¹Ne insenggir zuen te velinsuǥuen te Nengazen is tuked he egewezan din duen te keenen. Ne segugunà midlepew is regreg puun duen te vatu, ne migkaan dutun te hapuy sikan is usa wey supas. Ne nahanew sikan is belinsuǥuen.

²²Ne hein nesavut ni Gideon he velinsuǥuen bes iyan te Nengazen is neehè din, nekekaǥi sikandin te, “He Nengazen he MEGBEVAYÀ, neehè ku is belinsuǥuen nu ne neked-etuvang key.”

²³Piru migkeǥiyan sikandin te Nengazen te, “Mebmelinawen ka. Kenè ka mahandek su kenè ka ebpatey.”

²⁴Ne mibaal zutun si Gideon te pemuhatà para te Nengazen ne migngezanan din haazà te, “Ebeǥey te Kelinew is Nengazen.” Ne taman en guntaan kemulu heini he pemuhatà diyà te Ofra, diyà te tanà te menge kevuwazan ni Abiezer.

²⁵Dutun daan he kezukileman migkaǥi is Nengazen diyà te ki Gideon te, “Kuwaa nu is ikezuwa he kineupiyahan he vaka te amey nu, sikan is pitu en he tuig. Ne bengkaǥa nu is pemuhatà he para ki Baal he mibangun te amey nu wey elin penempeza nu is tukud he simbulu te vahi he ed-ezapen he si Ashera he avey zuen te pemuhatà.

²⁶Ne emun egkepasad nu en ne bangun ka te hustu he pemuhatà he para kediey, te Nengazen he Megbevayè nu, kayi te mibuntud-buntud. Ne ipemuhat nu kayi te kedì sikan is tudu he vaka he pemuhat he edtutungen. Ne iyan nu itavun sikan is tukud he para ki Ashera he ebpenempezen nu.”

²⁷Umbe, miduma ni Gideon is sepulù he suluǥuen din ne mibeelan dan is insuǥù te Nengazen kandin. Piru mezukilem is kebeeli zin dutun su egkahandek sikandin te pemilya zin wey te menge emurè din te inged.

²⁸Ne kegkemeselem dutun, ne iyan en nehuna maahà te nepukew he menge etew is nevengkag en he pemuhatà para ki Baal, wey is nengetamped en he tukud he para ki Ashera ne iyan en intavun para zuen te vaka he impemuhat diyà te veǥu he pemuhatà.

²⁹Mibpein-inseey sikandan ke hentei is mibaal zutun. Mibpurungan dan heini susiya ne netuenan dan he si Gideon he anak ni Joash is mibaal zutun.

³⁰Umbe, migkeǥiyan dan si Joash te, “Ipeǥawas nu kayi is anak nu! Su edhimetayan dey, su mibengkag din is pemuhatà he para ki Baal wey mibpenamped din is tukud he para ki Ashera ziyà te avey kayi.”