Zatù 20:15-40

¹⁵Dutun mismu he andew, neketiǥum is menge Benjaminhen te 26,000 he menge sundaru he ebpuun te menge inged dan, wazà lavet te 700 he pinilì he menge sundaru he menge tig-Gibea.

¹⁶Heini is 700 he mibpilì dan, puun te tivuuk he menge sundaru zan, pudu ǥivang. Ne is kada sevaha kandan memetau he edlabyug te vatu he ebpekeigù minsan iring kezeisey te sengeleǥas he vulvul.

¹⁷Ne gawas te tribu ni Benjamin, neketiǥum daan is menge Israilihanen te 400,000 he menge sundaru he memahagtì he ebpekidtebek.

¹⁸Midhendiyà te Betel is menge Israilihanen ne mid-insè dan diyà te Megbevayà ke hentei ki tribu is edhuna edsurung te menge Benjaminhen. Ne midtavak is Nengazen te, iyan is tribu ni Juda.

¹⁹Umbe, hein mid-ilis he andew, meselem pa migkampu en is menge Israilihanen diyà te uvey te inged he Gibea.

²⁰Ne nengandam dan wey mibpelastar is menge sundaru zan su ebpekidtebek te menge Benjaminhen.

²¹Ne migawas is menge Benjaminhen puun te Gibea te kebpekidtebek kandan. Ne zutun dà he andew, 22,000 he menge Israilihanen is nepatey te menge Benjaminhen.

²²Umbe, mid-uman medtekezeg diyà te Betel is menge Israilihanen ne midsineǥew zan dutun taman te mezukilem. Mid-insaan dan is Nengazen te, “Ed-uman key pe be ebpekidtebek te menge kezumahan dey he menge Benjaminhen?” Midtavak is Nengazen te, “Uya.” Umbe midinesiǥà sikandan ne mid-uman dan mebpelastar zuen te mibpelastaran dan.

²⁴Ne sunud he andew midsurung dan en maan is menge Benjaminhen.

²⁵Iyan, mid-uman en maan megawas is menge Benjaminhen diyà te Gibea ne midsinuǥung dan heini is duma zan he menge Israilihanen. Ne kayi he timpu, nepatey zan is 18,000 he menge Israilihanen he memetau he eǥamit te menge ispada.

²⁶Umbe, mid-uman en maan medtekezeg diyà te Betel is langun he menge Israilihanen ne midsineǥew zan. Neminuu zan, ne mibpuasa zan diyà te etuvangan te Nengazen dutun he andew taman te kebmezukilem. Nemuhat dan te menge pemuhat he edtutungen wey menge pemuhat he para te meupiya he kedepità.

²⁷(Dutun he timpu, ziyà te Betel sikan is Kavan te Kebpekid-uyun te Megbevayà kandan.

²⁸Ne is edumala zutun, iyan si Finehas he anak ni Eleazar wey apù ni Aaron.) Mid-umanan insai te menge Israilihanen is Nengazen te, “Ed-uman key pe be ebpekidtebek te kezumahan dey he menge Benjaminhen etawa kenè en?” Midtavak is Nengazen te, “Uman kew pekidtebek su keeselem ebpengelinteuwan ku en he mezaag niw sikandan.”

²⁹Umbe, mibpeeyanan te menge Israilihanen te menge sundaru is peliǥuy te Gibea.

³⁰Dutun te iketelu he andew, mibpelastar zan su ebpekidtebek dan te menge Benjaminhen iring te mibeelan dan te nehuna he menge andew.

³¹Ne iring te neulaula zuen te nengehuna he kebpekidtebek dan, midsinuǥung sikandan te menge Benjaminhen he nenggawas puun dutun te inged. Nekepatey is menge Benjaminhen te 30 he menge Israilihanen diyà te menge pemuleey wey ziyà te menge zalan pehendiyà te Betel wey Gibea.

³²Ne ǥeina te mibpelaǥuy is menge Israilihanen, kunaan te menge Benjaminhen ke egkezaag dan en maan is menge Israilihanen. Wazè dan meteuni he mibpezal-as is menge Israilihanen su para meuwit dan diyà te meziyù te inged heini is menge Benjaminhen.

³³Ne hein nekeuma is menge Israilihanen diyà te Baal-Tamar, ne mibpelastar zan dutun ne sikan mulà is nemen-eles he mid-ayan nemenggawas dan ne mibpelastar zan diyà te zapit te edsenlepan he vahin te Gibea.

³⁴Ne is 10,000 he pudu menge pinilì he menge sundaru te Israel, midsurung dan is Gibea. Nehitavù is dekelà he tebek, ne wazà metueni te menge Benjaminhen he hapit dan en egkepurung egkezeeti.

³⁵Mibpengelinteuwan te Nengazen he mekezaag is menge Israilihanen. Dutun he andew, nekepatey sikandan te 25,100 he menge Benjaminhen he mahagtì he menge sundaru.

³⁶Ne nesavut te menge Benjaminhen he nezaag en sikandan te menge Israilihanen. Mibpelaǥuy is dekelà he grupu te menge sundaru te Israel su midsarig sikandan duen te grupu he impeayan dan diyà te inged te Gibea.

³⁷Ne hein edal-as en kandan is menge Benjaminhen, midsurung en daan duen te nemen-ayan he menge sundaru is Gibea ne migerè dan is langun he menge etew zutun.

³⁸Iyan, te wazè pa heini meulaula, daan sikandan he mid-uyun he emun ebpekaahà te mekepal he evel ziyà te Gibea sikan is nemelaǥuy he menge Israilihanen, tuus haazà he

³⁹edlikù dan en te kebpekidtebek te menge Benjaminhen. Is menge Benjaminhen dutun, nekepatey en te 30 he menge Israilihanen, umbe kunaan dan ke egkezaag dan en maan is menge Israilihanen iring te nehuna he nengehitavù.

⁴⁰Ne midlipuwak is mekepal he evel ziyà te Gibea. Ne hein midlilingey is menge Benjaminhen, neehè dan is mekepal he evel he ebpuun diyà te inged dan.