Zatù 16:1-29

¹Duen timpu he midhendiyà si Samson te Gaza he sevaha he inged te menge Filistihanen. Ne zuen dutun neehè din he vahi he ebelegyà te zengeg din, ne midhulizan din haazà is bahi.

²Netudtulan is menge tig-Gaza he zutun si Samson, umbe midliǥuyan dan haazà is inged wey mibentayan dan is menge pultahan dutun te inged te tivuuk he kezukileman. Wazà sikandan mebpuǥad dutun he kezukileman. Su iyan disisyun dan he meselem dan edhimetayi si Samson.

³Piru taman dà te liwazà te kezukileman is kedhuliza ni Samson duen te vahi. Mid-enew sikandin ne midhendiyà te pultahan duen te inged. Migewezan din is menge tukud duen te pultahan ne mibazut din haazà ragkes is menge trangka zin. Ne ziyè din haazà uwita te puntur te vuntud he ebpekesinaru ziyà te Hebron.

⁴Dutun te huziyan he timpu, mibmahal ni Samson is sevaha he vahi he ziyà ed-ubpà te zal-ug he Sorek. Is ngazan din, iyan si Delila.

⁵Ne zutun, midhendiyà te ki Delila is menge pengulu te menge Filistihanen ne migkeǥiyan dan sikandin te, “Hengyui nu sikandin he keǥiya zin kenikew is hinungdan ke maan is utew sikandin mezesen wey ke ebmenmenuwen is kedaaǥa kandin, su wey zey sikandin mevakus su wey zey mevihag. Emun egkeveelan nu en heeyan, is kada sevaha kenami ebeǥey ziyà te kenikew te 1,100 he vuuk he pelata.”

⁶Umbe, mid-insaan ni Delila si Samson. Ke sikandin te, “Keǥiyi a kenikew te hinungdan ke maan is utew ka mezesen. Wey penenglitan duen ebakus etawa edakep kenikew ebmenmenuwen din heini te ebaal?”

⁷Midtavak si Samson te, “Emun ebekusen a te pitu he mehilew pa he tabpes te panà, egkeiring dà is desen ku te zesen te zuma he menge etew.”

⁸Hein netuenan haazà te menge pengulu te menge Filistihanen, mibeǥayan dan si Delila te pitu he mehilew he tabpes te panà ne mibakus din si Samson.

⁹Dutun duen nepipira he menge Filistihanen he mid-eles diyà te zivaluy he ruǥu. Ne mibensag si Delila te, “Samson, duen menge Filistihanen he nekeuma su edekepen ke zan.” Piru mibpemidtew zà ni Samson is imbakus kandin he henduen dà te menge tanur he netutung te hapuy. Wazè dan pa metueni is hinungdan te kezesen din.

¹⁰Migkeǥiyan ni Delila si Samson te, “Midlimbungan e zà kenikew; midterteruan a kenikew. Sigi en, keǥiyi ad kenikew te paaǥi te kegkevekusa kenikew.”

¹¹Migkaǥi si Samson te, “Emun ebekusen a te beǥu he pisì he wazè pa meǥamit, egkeiring dà is desen ku te zesen te zuma he menge etew.”

¹²Umbe, migkuwa si Delila te veǥu he pisì he wazè pa meǥamit ne mibakus din si Samson. Ne zuen nepipira he menge Filistihanen he mid-eles diyà te zivaluy he ruǥu. Ne mibensag si Delila te, “Samson, duen nekeuma he menge Filistihanen su edekepen ke zan!” Piru mibpemidtew ni Samson haazà is pisì he henduen dà te tanur.

¹³Umbe, migkaǥi en maan si Delila te, “Taman en guntaan is kedlimbungi nu wey kedterteru-i nu kedì. Sigi en, keǥiya nu en is paaǥi te kegkevekusa kenikew.” Migkaǥi si Samson te, “Emun idragkes te edhavel is pitu he selapid te vulvul ku ziyà te lilizen te hevelan, ne egkeiring dà is desen ku te zesen te zuma he menge etew.”

¹⁴Umbe, hein nekelipezeng si Samson, inhiket ni Delila is pitu he selapid te vulvul ni Samson diyà te lilizen te hevelan, ne nemensag sikandin te, “Samson, duen nekeuma he menge Filistihanen su edekepen ke zan.” Ne mid-enew si Samson ne nelaglag is hevelan wey hinavel.

¹⁵Umbe, migkeǥiyan sikandin ni Delila te, “Egkeǥiyen nu he mahal a kenikew, piru kenè bes tutuu. Su ketetelu ad kenikew limbungi. Wazè nu keǥiya kedì ke hendei ebpuun is desen nu.”

¹⁶Andew-andew is kebpenginginsà dutun te vahi ki Samson ne hein neuǥet kenè en sikandan ebpekaantus.

¹⁷Umbe, migkaǥi zin en duen te vahi is tutuu. Ke sikandin te, “Wazà meǥuntingi is bulvul ku minsan kesevaha. Minsan hein ikeǥingey e pa, mibpeveyveyaan ad te Megbevayà pinaaǥi te kedhimuwa kedì he Nazareo. Umbe emun egkeǥuntingan is bulvul ku, egkeiring dà is desen ku te zesen te zuma he menge etew.”

¹⁸Neǥezam ni Delila he tutuu is migkaǥi ni Samson. Umbe zuen midsuǥù din he ibpekaǥi ziyà te menge pengulu te menge Filistihanen he medlikù dan su migkaǥi en ni Samson diyà te kandin is tutuu. Umbe midlikù sikan is menge pengulu, ne mid-uwit dan en te selapì he ibayad dan diyà te ki Delila.

¹⁹Impelipezeng ni Delila si Samson he impeulun diyà te vuvun din, ne hein nehurep en, mid-umew sikandin te sevaha he etew he ibpevangul zin ki Samson. Umbe mibmeluya si Samson, ne impezakep sikandin ni Delila.

²⁰Mibensag si Delila te, “Samson, duen menge Filistihanen he nekeuma su edekepen ke zan.” Ked-enew ni Samson kunaan din ke ebpekaawà sikandin pinaaǥi te kebeeli zin te iring duen te nehuna he mibeelan din. Wazè din metueni he mid-ewaan en sikandin te Nengazen.

²¹Midakep sikandin te menge Filistihanen ne midluǥit dan is menge mata zin. Mid-uwit dan sikandin diyà te Gaza ne migkedinahan dan te brunsi. Midhimu zan sikandin he perepenggaling te trigu ziyà te seled te pirisuwan.

²²Piru ednaneynaney en edsuvul is bulvul zin.

²³Duen timpu, he midtiǥum is menge pengulu te menge Filistihanen su edsilibra zan wey ebpemuhat dan te mahabet he menge pemuhat he para te ed-ezapen dan he si Dagon. Dutun te kedsilibra zan migkanta zan is edhenduen te: “Mibpengelinteuwan te ed-ezapen tew he mezaag tew si Samson is kuntada tew.”

²⁴Ne hein naahà sikandin te menge etew midalig dan is ed-ezapen dan. Ke sikandan te, “Impalad te ed-ezapen tew kayi te kenitew is kuntada tew he mibeǥey te zekelà he kezeetan kayi te tanè tew wey midhimatey te mahabet kenitew.”

²⁵Tenged te kelipey zan, neisip dan he edhimuwen dan si Samson he velvelayen. Umbe impeǥawas dan si Samson dutun te pirisuwan ne impehitindeg dan diyà te pid-elangan te zezuwa he tukud ne midhimu zan he egkeengitan.

²⁶Migkeǥiyan ni Samson is suluǥuen he ed-aǥak kandin te, “Ipeǥawed a ziyà te tukud kayi te simbahan su wey a mekesandig.”

²⁷Nepenù te etew haazà is simbahan. Dutun daan is langun he menge pengulu te menge Filistihanen. Diyè dà te atep, ne zuen en 3,000 he menge etew, maama wey vahi. Nelangan sikandan he ed-ahà ki Samson.

²⁸Dutun nengemuyù si Samson he ke sikandin te: “He Nengazen he MEGBEVAYÀ, tentenuzi a kenikew. Emun egkehimu ilikù nu is desen ku minsan kesevaha zà su wey a mekevales te kedluǥita kayi te menge Filistihanen te menge mata ku.”

²⁹Ne migawed si Samson dutun te zezuwa he teliwazà he tukud he iyan biǥer zutun te simbahan. Is kewanan he velad din inggawed din diyà te sevaha, ne is givang diyà te sevaha pa he tukud.