ZABURA 88:1-16

¹Ɛzɛra buri Emani lɛ̀ɛ. Dikiri Luda ma Surabari, matɛn wiki lɛ́mma fãnantɛ̃ kũ gwãanio.

²Ǹ tó ma aduakɛna kámma, ǹ sã kpá ma ↄ́ↄdↄnaai.

³Zaakũ yã'ũmmana ma nɛ̀sɛɛ pà, ma wɛ̃̀ndii kú ga lɛ́i.

⁴Ò ma da gbɛ̃ kũ òtɛn si gyãwãnnnↄ tɛ́, ma gↄ̃ gbãnasaride ũ.

⁵Ò pã kpàmai ò ma da gɛ̀nↄ tɛ́ lán gbɛ̃ kũ ò wutɛna miran sↄ̀rↄrↄnↄ bà, lán gbɛ̃ kũ ń yã dↄngu doro ń bàka kú kũnworonↄ bà.

⁶N ma zu wɛ̀ɛ lòkoton ari zĩtɛ tú tↄ̃̀nↄwɛɛ gusiran.

⁷N pↄfɛ̃ tↄ̃̀ma, a ísↄ̃ dàmala.

⁸N tò ma gbɛ̃nↄ ma zukũna, n tò ò ye ma kãiro. Ò ma tata, boki kunlo,

⁹warikɛna ma wɛ́ sira kũ̀. Matɛni n sísi zaa kↄnkↄ ari ↄkↄsi, ma ↄnↄ dↄnanyĩ.

¹⁰Gɛ̀nↄn ndì yãbonsarɛ kɛńnɛ yá? Gyãwãndenↄ mɛ́ òdi futɛ ò n sáabu kpá yá?

¹¹Òdi n gbɛ̃kɛ baba mira gũnn yá? Òdi n náanikɛna yã o gyãwãnn yá?

¹²Ò n daboyãnↄ dↄ̃ gusira gũnn yá? N yãmanakɛnanↄ dↄ̃na kú yãsãnguki gũnn yá?

¹³Dikiri, matɛn ↄ́ↄ dↄnnɛ, ma aduakɛna kↄnkↄ dì ká n kĩnaa.

¹⁴Bↄ́yãi ntɛn gímaii, Dikiri? À kɛ̀ dera n mìkpɛrɛ zùmɛnɛɛ?

¹⁵Má kú ga lɛ́i wɛ̃ndawɛ̃nda zaa ma kɛfɛnnakɛgↄrↄa, n yã pãsĩnↄ tↄ̃̀ma, ma gↄ̃ sã̀ii.

¹⁶N pↄfɛ̃namai dàmala, n vĩnapↄnↄ ma kakatɛ.