ZABURA 69:16-34

¹⁶Ǹ wema Dikiri, zaakũ n gbɛ̃kɛ mana, ǹ arɛ dↄma n sùru zↄ̃kↄ̃ↄ gũn.

¹⁷Ǹsun mìkpɛrɛ zu n zↄ̀bleriinɛro, ǹ wema likalika, zaakũ ma gↄ̃ kagura gũmmɛ.

¹⁸Ǹ namai ǹ ma mì sí, ǹ ma sura ba ma ibɛrɛnↄa.

¹⁹Ń ma sↄ̃sↄ̃na dↄ̃ kũ ma wé'idammanaao kũ ma kpebonaao, ntɛn gbɛ̃ kũ ò ma kũna kũ yãonↄ e.

²⁰Sↄ̃sↄ̃naa ma swɛ̃̀ɛ zↄ̃̀, ma gↄ̃ gbãna sari, gbɛ̃ kũ ani ma wɛ̃nda gwan ma wɛ̀tɛ, mádi lero, gbɛ̃ kũ ani ma nɛ̀sɛ kpátɛmɛnɛn ma wɛ́ dↄ̀i, à kunlo.

²¹Ò ɛzɛ vãni kàmɛnɛ pↄ́blen, kũ ími ma kũ, ò sèwɛ̃ kpã̀kpãa kpàma mà mi.

²²Ń dikpɛkɛna gↄ̃ńnɛ tankutɛ ũ à ń kũ à yã lúńnɛ.

²³Ń wɛ́ sira kũ de òsun gu ero, ń wó gↄ̃ kokona.

²⁴Ǹ n pɛ̃tɛ̃ kipaḿma, ǹ n pↄfɛ̃ pãsĩ pisiḿma.

²⁵Ń bɛ gↄ̃ bɛzĩ ũmɛ, ń gbɛ̃ke súngↄ̃ kun de à vutɛ ń kpɛ́n doro.

²⁶Zaakũ òdi wɛ́ tã gbɛ̃ kũ n ń lɛ́nↄa, òdi gbɛ̃ kũ n ń kĩnnanↄ wãwã yã o.

²⁷Ǹ ń yã sĩnda pínki taari dińnɛ, ń baka súngↄ̃ kú n surabanaa gũnlo.

²⁸Ǹ ń tↄ́ gogo wɛ̃̀ndi takada gũn, ń tↄ́ súngↄ̃ kú kũ gbɛ̃ mananↄ tↄ́oro.

²⁹Luda, má kú wãwã kũ yã'ũmmanaao gũn, ǹ ma sɛ́ lei de mà bo aafia.

³⁰Mani Luda tↄ́ bo lɛ̀sinaa gũn, mani a sáabu kɛ mà a tↄ́ sɛ́ lei.

³¹Abirekũ ni ká Dikirigu de sa'ona kũ zùuola, bee zùsanɛ kũ à bɛ̃nɛ vĩ.

³²Takasidenↄ ni e ò pↄnna kɛ, ákↄ̃nↄ Luda ki wɛtɛrinↄ nigↄ̃ wɛ̃̀ndi vĩ.

³³Zaakũ Dikiri dì wɛ̃ndadenↄ yã ma, àdi a gbɛ̃ kũ ò de zĩ̀zↄ ũnↄ gya boro.

³⁴À a táaki lɛ́ musu kũ zĩtɛo, ísira kũ pↄ́ kũ ò kú a gũnnↄ pínki.