ZABURA 55:1-20

¹Dauda lɛ̀ɛ. Òdi sí kũ guruminↄmɛ. Luda, ǹ ma aduakɛna ma, ǹsun lá kú ma yãlaro.

²Ǹ sã wɛ̃ ma yãi ǹ wema, ma laasun ma likara ma gↄ̃ bídi gũn,

³ma ibɛrɛnↄ yã'ona yãi kũ gbɛ̃ vãninↄ wɛ́birimanaao, zaakũ òtɛn wari dↄmamɛ, ò ma kũna kũ pↄfɛ̃o.

⁴Swɛ̃̀ɛ kɛ̃̀magu, ga vĩna gɛ̃̀magu.

⁵Vĩna ma kũ, matɛn lukaluka, ma nini vùra.

⁶Tó má dɛ̀mbɛrɛ vĩ lán potɛ̃nɛ bà, de mani vura mà gɛ́ kámma bo,

⁷mani bàa lɛ́ mà gɛ́ zã̀zã, mani gɛ́ mà vutɛ gbárannan.

⁸Mani wã mà gɛ́ mà utɛki wɛtɛ, de zàga'ĩa gbãna sún ma lero yãi.

⁹Ǹ ń yã gboro, Dikiri, ǹ ń yã yãkatɛńnɛ, zaakũ ma è zuka kũ fìtiio kú wɛ̃tɛ gũn.

¹⁰Òdi kpátɛ kɛ bĩni musu fãnantɛ̃ kũ gwãanio, yã vãni kũ yã gbãnao di wɛ̃tɛ gũn.

¹¹Gbɛ̃dɛdɛyã mɛ́ à wɛ̃tɛ pìi pà, gbãnamↄnnɛna kũ manafikio dì kɛ̃ a batunlo.

¹²Tó ma ibɛrɛ mɛ́ àtɛni ma sↄ̃sↄ̃ yã, mani mɛna, tó ma zãnguri mɛ́ à fùtɛmai, mani utɛnɛ.

¹³Ama mↄkↄ̃n, mↄkↄ̃n kũ ó sára lɛ́lɛ, ma gbɛ̃ndo, ma gbɛ̃nna!

¹⁴Odì fàai bo kũ kↄ̃o yã nnanna, odìgↄ̃ tɛ́kↄ̃i pari tɛ́ Luda ↄnn.

¹⁵Ga ni zãmba kɛ ma ibɛrɛnↄnɛ, ò si gyãwãn ń gbãnagↄrↄ, zaakũ vãni vutɛki è ń gũn.

¹⁶Makũ sↄ̃, madì Luda sísi, akũ Dikiri dì ma sura ba.

¹⁷Kↄnkↄ, fãnantɛ̃ kũ ↄkↄsio madìgↄ̃ ma yã'ũmmananↄ bↄtɛnɛ kũ ndanaao, akũ àdi ma yã ma.

¹⁸Bee kũ ma ibɛrɛnↄn dasi, àdi ma sí à ma bo fìtin aafia.

¹⁹Luda dìgↄ̃ vutɛna kpatan gↄrↄ sĩnda pínki, ani ma yã ma, ani wé'i daḿma, zaakũ òdi ń dà litɛro, ò Luda vĩna vĩro.

²⁰Ma gbɛ̃ pìi fìti kɛ̀ kũ a gbɛ̃nↄo, à bò lɛ́dokↄ̃nↄ kũ ò kɛ̀ kũ kↄ̃o kpɛ.