ZABURA 45:1-11

¹Yenyĩ lɛ̀ kũ Kora burinↄ dà. Yã nna tɛn pípi ma swɛ̃̀ɛ gũn, lákũ matɛn lɛ̀ díkĩna da kínanɛ nà. Ma lɛ́ nna lán takadakɛ̃ri mana takadakɛ̃bↄↄ bà.

²N manakɛ de gbɛ̃ sĩnda pínkila, n lɛ́gbɛɛ dìgↄ̃ nna, arubarika kũ Luda dàngu lakana vĩro.

³Mↄkↄ̃n zĩ̀kari pãsĩ, ǹ n fɛ̃nɛda sɛ́ ǹ loko n kíkɛgakuri sèeda ũ.

⁴Ǹ di sↄ̃a ǹ gɛ́ zĩ̀ ble n gakurikɛ gũn yãpura kũ nɛ̀sɛdoo kũ yãzɛdeo yãi, ǹ yã náasidenↄ kɛ kũ n ↄpla gbãnao.

⁵Kí, n kànↄ lɛ́ sↄ̃ntɛ, àdi gɛ̃ à n ibɛrɛnↄ swɛ̃̀ zↄ̃, burinↄ dì lɛ́tɛ n gbá sarɛ.

⁶Luda, ĩnigↄ̃ vutɛna kpatan gↄrↄ sĩnda pínki, ĩnigↄ̃ n kíkɛgo kũna yãzɛde ũ.

⁷Ń ye yãmanakɛnaai, n zã a yãvãnikɛnagu. À yã mɛ́ à tò Luda, n Luda, n ka kín, à pↄnna pìsimma de n gbɛ̃nↄla.

⁸Lí'ↄ gbĩ nnanna pìsi n pↄ́kasanↄa, mↄrↄ'ũ dì n pↄ kɛ nna n kpɛ́ kũ ò kɛ̀kɛ kũ wisa sakaao gũn.

⁹Kína nɛ́nↄgbɛ̃nↄn kú n nↄ yenyĩdenↄ tɛ́, n nↄ dufu kú n ↄplai, à Ofi bùsu wurapↄnↄ dana.

¹⁰Nɛ́nↄkpare, ǹ sã kpá ǹ ma! N de bɛ kũ n gbɛ̃nↄ yã sún donnɛ arɛro.

¹¹N nↄmanakɛ tɛn kína mɛ̀ɛ luka, ǹ mì natɛnɛ, zaakũ n dikirimɛ a ũ.