ZABURA 44:3-21

³Adi kɛ ń fɛ̃nɛda mɛ́ à ń ká bùsu díaro, ń gã̀sã gbãnan ò zĩ̀i blèoro. N zĩda gã̀sã gbãna mɛ́ à tò, n arɛ dↄ̀ḿma kũ ń yeńyĩ yãi.

⁴Mↄkↄ̃mmɛ ma Kína ũ ma Luda, ndì tó Yakubu burinↄ zĩ̀ ble.

⁵N gãin odì ↄ sↄ̃ ó ibɛrɛnↄi, kũ n tↄ́on odì gbá pɛ́tɛpɛtɛ ó zãngurinↄa.

⁶Adi kɛ ma sá náanikɛnanlo, adi kɛ ma fɛ̃nɛda mɛ́ àdi ma boro.

⁷Zaakũ mↄkↄ̃n mɛ́ ndì ó sí ó ibɛrɛnↄa, ndì wé'i da ó zãngurinↄa.

⁸Luda, odìgↄ̃ n sáabu kpá gↄrↄ sĩnda pínki, odìgↄ̃ n tↄ́ kpá lakanaa sari.

⁹Bee kũ abireo n giwái n tò wé'i ó kũ, ndì bo kũ ó zĩ̀karinↄ doro.

¹⁰N tò o boru kpɛ ó ibɛrɛnↄnɛ, n tò ó zãngurinↄ ó pↄ́nↄ nàkↄ̃a.

¹¹N ń gbá zɛ́ ò ó dɛdɛ lán sãnↄ bà, n ó fãkↄ̃a burinↄ tɛ́.

¹²N n gbɛ̃nↄ yìa araga, ńdi àre le a gũnlo.

¹³N tò ó gbɛ̃dakenↄ ó sↄ̃sↄ̃, gbɛ̃ kũ ò kú ó sarɛnↄ ó lalandii kɛ̀.

¹⁴N tò o gↄ̃ baaru pↄ́ ũ burinↄnɛ, gbɛ̃nↄ dì ń mì yĩgãwɛrɛ.

¹⁵Madìgↄ̃ kú kũ wé'io gↄrↄ sĩnda pínki, ma gasuu gↄ̃̀ kpá ma wɛ́i

¹⁶ma lalandikɛrinↄ kũ ma sↄ̃̀sↄ̃rinↄ yãi kũ ma ibɛrɛ kũ ò ye ò fĩna bomanↄ yão.

¹⁷Abirekũ ó lé pínki, bee kũ n yã dí sãóguro, ódi n bàka kunna kũoo yã gbororo.

¹⁸Ó laasun dí kɛ̃mmaro, ódi kɛ̃ n zɛ́aro.

¹⁹N ó kɛ́ dúgudugu, n ó bùsu kɛ̀ gbɛ̃gbonnↄ kureki ũ, n gusira níkiniki dàóla.

²⁰Tó ó Dikiri tↄ́ sã̀ógu yã, ke tó ó wɛ́ dↄ̀ buri zĩ̀tↄnↄ tãnanↄi,

²¹Luda ni gí ei yá? Zaakũ àkũ mɛ́ à ó nɛ̀sɛgũnyãnↄ dↄ̃ pínki.