ZABURA 25:4-22

⁴Dikiri, ǹ n zɛ́ mↄmɛnɛ, ǹ n yã dadamɛnɛ.

⁵Ǹ ma da n yãpura zɛ́n, ǹ a yã dadamɛnɛ, zaakũ Luda ma surabariimɛ n ũ, ma wɛ́ dìgↄ̃ dↄnyĩmɛ gↄrↄ sĩnda pínki.

⁶N wɛ̃nda kũ n yenyĩo gↄ̃ dↄngu, zaakũ abirekũnↄ kú kũnwo zaa zĩ, Dikiri.

⁷Ǹsun taari kũ ma kɛ̀nↄ yã daro ke durunna kũ ma kɛ̀ ma kɛfɛnnakɛgↄrↄanↄ. Ǹ tó ma yã gↄ̃ dↄngu yenyĩ gũn, kũ ń mana yãi, Dikiri.

⁸Dikiri mana, àdi yã kɛ a zɛ́a, abire yãi àdi a yã dada durunnakɛrinↄnɛ.

⁹Àdi zĩdabusarinↄ da a zɛ́a, àdi yã mana dadańnɛ.

¹⁰Dikiri dìgↄ̃ yenyĩ kũ náanio vĩ kũ gbɛ̃ kũ ò a bàka kunna kũńwo yã kũnanↄ.

¹¹Bee kũ ma durunna zↄ̃kↄ̃ Dikiri, ǹ kɛ̃ma n tↄ́bona yãi.

¹²Dí mɛ́ à Dikiri vĩna vĩi? Dikiri dì ade da zɛ́ kũ à de à sɛ́a.

¹³Ade nigↄ̃ kú nnamanaa gũn, a burinↄ mɛ́ onigↄ̃ ń bùsu vĩ.

¹⁴Dikiri nna kũ a vĩnakɛrinↄ, àdi tó ògↄ̃ a bàka kunna kũńwo yã dↄ̃.

¹⁵Ma wɛ́ dìgↄ̃ dↄ Dikiria baala'i, àkũ mɛ́ àdi ma gbá bo bàn.

¹⁶Ǹ arɛ dↄma, ń ma wɛ̃nda gwa, zaakũ má kú mado wɛ́tãmma gũn.

¹⁷Ma yã'ũmmananↄ kàra ma nɛ̀sɛɛ gũn, ǹ ma bo ma wari pìn.

¹⁸Ǹ ma wɛ́tãmma kũ ma pↄsirao gwa, ǹ ma durunnanↄ kɛ̃ma pínki.

¹⁹Ǹ gwa lákũ ma ibɛrɛnↄ dàgula nà, ò zã̀magu pãsĩpãsĩ.

²⁰Ǹ ma wɛ̃̀ndi dãkpã, ń ma sura ba, ǹsun tó wé'i ma kũro, zaakũ ma nanyĩ.

²¹Ǹ tó yãpura kũ kunna manao gↄ̃ ma dãkpã, zaakũ ma wɛ́ dìgↄ̃ dↄnyĩ.

²²Luda, ǹ Isarailanↄ bo ń warikɛnanↄn pínki.