ZABURA 19:1-10

¹Dauda lɛ̀ɛ. Musu dì Luda gakuri bo gupuraa, sarapurapↄnↄ dì a ↄzĩ mↄńnɛ.

²Àdigↄ̃ yã o'ońnɛ lán gu dìgↄ̃ dↄ nà, àdi dↄ̃na kpáńnɛ gwãani kũ gwãanio.

³Àdi yã oro, a yã'ona buri ke kunlo, òdi a kĩni maro.

⁴A kòtoo dì da anduniala pínki, a yã'onaa dì gɛ́ ari zĩtɛ lɛ́a. Luda kpɛ́ bò ifãntɛ̃nɛ gwe,

⁵àdi bo kpɛ́n à futɛ lán nↄsɛrii bà, àdi futɛ táo kũ pↄnnao lán gↄ̃sa gbãna bà.

⁶Àdi futɛ ludambɛlɛa la, àdi bikũ à gɛ́ ari a lɛ́a dire, pↄ́ke dìgↄ̃ utɛna a puusuiro.

⁷Dikiri doka papana, àdi ń kunna kɛkɛ à kɛńnɛ dↄ. Dikiri yã náani vĩ, àdi lɛ́ da ↄ̃ndↄ̃saridenↄa.

⁸Dikiri dì ↄdↄki dↄńnɛ súsu, àdi ń pↄ kɛ nna. Dikiri yãditɛnanↄn gbãsĩ vĩro, àdi ń ãn wereńnɛ.

⁹Mìnatɛna Dikirinɛ zɛ́ pì wɛ́bona, onigↄ̃ tɛ́i gↄrↄ sĩnda pínki, Dikiri yãkpatɛkɛna yãpura vĩ, àdigↄ̃ mana swáswa.

¹⁰A mana de wurala, bee wura mana, a nna de zↄ́'ila, bee zↄ́ búsu.