1Aleluya! À Dikiri tↄ́ bo! À Dikiri sáabu kpá, ákↄ̃nↄ a zĩkɛrinↄ!
2Ákↄ̃nↄ kũ adì zĩ kɛ Dikiri bɛanↄ, á gbɛ̃ kũ adìgↄ̃ zɛna ó Luda ↄnnnↄ.
3À Dikiri tↄ́ bo, zaakũ à mana, à a táaki lɛ́, zaakũ abirekũ mɛ́ à nna.
4Dikiri Yakubu burinↄ sɛ̀ a pↄ́ ũ, à Isarailanↄ dìtɛ a gbɛ̃ yenyĩdenↄ ũ.
5Má dↄ̃ kũ Dikirin zↄ̃kↄ̃, ó Luda mɛ́ à de tãnanↄla ń pínki.
6Dikiri dì yã kũ à yei kɛ musu kũ zĩtɛo, ísira gũn kũ a lↄ̀nↄo.
7Àdi tó legũ sisi ari andunia lɛ́zɛkia, àdi tó legũ ma kũ a pinaao, àdi bo kũ zàga'ĩao a pↄ́katɛkin.
8À Misila daudunↄ dɛ̀dɛ kũ pↄ́kãde nɛ́ káakunↄ pínki.
9À sèedanↄ kũ daboyãnↄ kɛ̀ Misila, à wɛ́ tã̀ Firi'auna kũ a ìbanↄa ń pínki.
10À burinↄ làka dasi, à kína gbãnadenↄ dɛ̀dɛ,
11Amↄrinↄ kína Siↄ̃ kũ Basã kína Oguo kũ Kanaanↄ bùsu kínanↄ ń pínki.
12À ń bùsu sì à kpà a gbɛ̃ Isarailanↄa túbi ũ.
13Dikiri, n tↄ́ dìgↄ̃ kun gↄrↄ sĩnda pínki, Dikiri, n yã nigↄ̃ dↄ gbɛ̃nↄgu ari ó buria.
14Zaakũ Dikiri ni tó a gbɛ̃nↄ bo mana, ani a zↄ̀blerinↄ wɛ̃nda gwa.
15Burinↄ ń tãnanↄ pì kũ andurufuuo kũ wuraao, bisãsiri ↄzĩnↄmɛ.
16Ò lɛ́ vĩ, ama òdi yã oro, ò wɛ́ vĩ, ama òdi gu ero,
17ò sã vĩ, ama òdi yã maro, òdi wesa boro.
18Ń pìrinↄn lɛɛlɛ kũńwomɛ kũ gbɛ̃ kũ òtɛni ń náani kɛnↄ ń pínki.
19Isarailanↄ, à Dikiri sáabu kpá! Haruna burinↄ, à Dikiri sáabu kpá!
20Levi burinↄ, à Dikiri sáabu kpá! Dikiri vĩnakɛrinↄ, à Dikiri sáabu kpá!
21Arubarikademɛ Dikiri ũ zaa Zaiↄ̃, àkũ kũ à kú Yurusalɛmu. Aleluya!
ZABURA 135
ZABURA 135:1-21