Zəbur 7:7-16

⁷Ümmətlər icması Sənin ətrafına yığılsın, Sən onların başı üzərində ucal, hökmünü ver.

⁸Rəbb xalqlar üzərində hakimlik edir; Məni mühakimə et, ya Rəbb, Salehliyimə, kamilliyimə görə mənə haqq qazandır!

⁹Pislərin pisliyi sona yetsin, Salehlərsə möhkəmlənsin! Ey adil Allah, çünki Sən düşüncələri, hissləri bilirsən.

¹⁰Allah mənim sipərimdir, Ürəyidüz olanları xilas edir.

¹¹Allah adil hakimdir, Hər gün haqsızlığa görə hökm verir.

¹²Pislər yolundan dönməzsə, O, qılıncını itilər, Ox-kamanını qurar,

¹³Onlara qarşı ölüm silahları hazırlayar, Yandırıcı oxları ilə nişan alar.

¹⁴Pislər hiyləyə hamilə olar, Şər üçün ağrı çəkər, yalan doğar.

¹⁵Onlar başqasına quyu qazar, dərinləşdirər, Qazdıqları quyuya özləri düşər.

¹⁶Yamanlıqları öz üstlərinə dönər, Zorakılıqları başlarına düşər.