Zəbur 78:3-37

³Bunları eşitmişik, bilirik, Bizə atalarımız nəql edib.

⁴Bunu onların nəvələrindən gizlətməyəcəyik; Rəbbin həmdə layiq işlərini, Onun qüdrətini, etdiyi xariqələri Gələcək nəsillərə söyləyəcəyik.

⁵Rəbb öyüd vermək üçün Yaqub nəslinə – İsrailə bir təlim qoydu. Ata-babalarımıza əmr etdi ki, Bu təlimi övladlarına öyrətsin.

⁶Qoy gələcək nəsil də bilsin, Gələcəkdə doğulacaq övladlar da Balalarına bu təlimi verə bilsin.

⁷Qoy ümidlərini Allaha bağlasınlar, Allahın işlərini unutmasınlar, Əmrlərini yerinə yetirsinlər.

⁸Qoy ata-babaları kimi olmasınlar, Çünki onlar dikbaş, üsyankar bir nəsil idi. Allaha ürəkləri dönük, Könülləri vəfasız idi.

⁹Efrayim övladları ox-kamanla silahlandılar, Amma döyüş günü tez geriyə qayıtdılar.

¹⁰Allahın əhdini pozanlar belə etdilər, Sənin qanunlarınla yaşamaq istəmədilər.

¹¹Allahın işlərini, Göstərdiyi xariqələrini unutdular.

¹²Allah Misir torpağında, Soan bölgəsində, Ata-babalarının gözləri önündə xariqələr göstərmişdi.

¹³Dənizi yarıb onları keçirmişdi, Suları divar kimi saxlamışdı.

¹⁴Onlara gündüz buludla, Bütün gecə şəfəq saçan alovla yol göstərmişdi.

¹⁵Çöldə qayaları yarmışdı, İçsinlər deyə ümman kimi bol su çıxarmışdı.

¹⁶Qayadan suları sel kimi çıxarmışdı, Bu suları çaylar kimi axıtmışdı.

¹⁷Amma onlar günah etməyi davam etdirdilər, Səhrada Haqq-Taalaya qarşı üsyankar oldular.

¹⁸İştahaları artdı, yemək tələb etdilər, Ürəklərində Allahı sınağa çəkdilər.

¹⁹Allahın əleyhinə belə danışdılar: «Məgər Allah çöldə süfrə qura bilər?

²⁰Nə olsun qayaya vuranda sular axdı, Sellər aşıb-daşdı. Görəsən O, çörək verə bilərmi? Xalqına ət verə bilərmi?»

²¹Rəbb bunu eşidərkən qəzəbləndi, Yaquba qarşı alovunu yerə tökdü, İsrailə qarşı hiddəti artdı.

²²Çünki onlar Allaha inanmırdılar, Onun qurtuluşuna arxalanmırdılar.

²³Bununla belə, uca səmaya əmr etdi, Göylərin qapılarını açdırdı.

²⁴Onlara yemək üçün manna yağdırdı, Göylərin taxılını verdi.

²⁵İnsan mələklərin çörəyindən yedi, Onlara doyunca yemək verildi.

²⁶Göylərdə şərq küləyini əsdirdi, Qüdrəti ilə cənub küləyini gətirdi.

²⁷Başlarına toz kimi ət yağdırdı, Onlara dənizdəki qum qədər quşlar göndərdi.

²⁸Düşərgələrinin ortasına, Qaldıqları yerin ətrafına səpələdi.

²⁹Onlar doyunca, çox yedi, İştahaları çəkən şeyləri onlara verdi.

³⁰Lakin iştahaları qurtarmamış, Yemək ağızlarında olarkən

³¹Allah onlara qarşı hiddətini artırdı, Ətli-canlılarını qırdı, İsrail igidlərini vurub yerə sərdi.

³²Bununla belə, günahlarını davam etdirdilər, Onun xariqələrinə inanmadılar.

³³Buna görə də günlərini puç etdi, Dəhşətlə ömürlərini sona yetirdi.

³⁴Ölənləri görüb Allahı axtardılar, Geri dönüb Allahı səylə aradılar.

³⁵Yadlarına düşdü ki, Allah onların Qayası idi, Allah-Taala onların Satınalanı idi.

³⁶Lakin ağızları ilə Ona yaltaqlanırdılar, Dilləri ilə Ona yalan danışırdılar.

³⁷Qəlblərində Ona qarşı dönük olmuşdular, Əhdinə vəfasız çıxmışdılar.