ZĨRINƆ 9:23-39

²³Gurↄ plaaa gbɛra Yudanↄ lɛ́ kpàkↄ̃sↄ̃zi aↄ̃ à dɛ,

²⁴ben à ń lɛ́kpakↄ̃sↄ̃naazii pì mà. Aↄ̃ↄe wɛ́tɛ bĩilɛnↄ dãkpaa fãantɛ̃ kↄ̃n gwãavĩo lɛ wà à dɛ yãnzi.

²⁵Gwãavĩn Solu gbɛ̃nↄ à dà gbíin wà à gbàrɛ kↄ̃n bào bàazi bↄna bĩi musu.

²⁶Kɛ̀ à kà Yerusalɛmu, à wɛ̀tɛ à na Yesudeenↄa, ben aↄ̃ vĩa kɛ̀nɛ ń píngi, aↄ̃ↄe à Yesudekɛ wɛ́ɛ síro.

²⁷Ben Banaba à sɛ̀ à gàao zĩ̀rinↄ kiia, à gbã̀ńnɛ lán Solu Dii è zɛ́n nà kↄ̃n yã kɛ̀ Dii ònɛo kↄ̃n lán à Yesu yã ò gupuraaa nà zaa Damasikuo.

²⁸Ben Solu gɛ̃̀ ń tɛ́ à lìgańyo Yerusalɛmu à yã ò gbɛ̃nↄnɛ kↄ̃n Dii tↄ́o gupuraan.

²⁹Kɛ̀ à yã ò Yuda Girikiyãmarinↄnɛ à lɛokpakↄ̃a kɛ̀ńyo, ben aↄ̃ↄe wɛtɛɛ wà à dɛ.

³⁰Kɛ̀ à gbɛ̃nↄↄ dↄ̃̀, aↄ̃ gàa wà zɛ̀nɛ Sizarea, ben à tà Taasu.

³¹Beee gbɛra sↄsi kɛ̀ kú Yudea kↄ̃n Galilio kↄ̃n Samaria bùsuo kuu aafia píngi. Aↄ̃ↄe gbãa kũu wèe gaa aɛ vĩakɛna Diinɛ guu, aↄ̃ↄe kaara kɛ̀ Luda Nini ń làakari kpàɛńnɛ yãnzi.

³²Pita è lili o wɛ́tɛ kↄ̃n wɛ́tɛo píngi, ben à gàa Luda gbɛ̃ kɛ̀ aↄ̃ↄ kú Lidanↄ gwa.

³³À gↄ̃gbɛ̃ kɛ̀ wè benɛ Ainɛa è gwe, à kↄ̃̀ↄ kũ̀ kaɛna wɛ̃̀ sↄraagↄ̃.

³⁴Ben Pita bènɛ: Ainɛa, Yesu Kirisi n kɛ̃kↄ̃a. Ǹ fɛɛ ǹ n pɛ̀ koko. Ben à fɛ̀ɛ gↄ̃ↄ.

³⁵Lidadeenↄ kↄ̃n Sarↄnudeenↄ à è, ben aↄ̃ lìɛ wà aɛ dↄ̀ Diia.

³⁶Nↄgbɛ̃ Yesude kee kú Yↄpa à tↄ́n Tabita, kↄ̃n Giriki yão sↄ̃ Dↄkasi. Tↄ́ pì bè zↄ̃. Yã maa kɛna pɛ̀kↄ̃rɛa, bensↄ̃ à takaasideenↄ wɛ̃nda dↄ̃.

³⁷Gurↄ beeean à gyãa kɛ̀ à gà. Kɛ̀ wà à zú ò, wà à sɛ̀ wà dàɛ kpɛ́ musu guu.

³⁸Yↄpa sↄ̃ↄ zã̀ kↄ̃n Lidaoro. Kɛ̀ Yesudeenↄↄ mà Pita kú gwe, aↄ̃ ń gↄ̃ↄn plaaanↄ zĩ̀a aↄ̃ wɛ́ɛ kɛ̀a wà bè: Ǹ mↄ́ wa kiia kpakpaa.

³⁹Ben Pita fɛ̀ɛ à gàańyo. Kɛ̀ à kà, wà dìdio kpɛ́ pì musu. Ben gyaanↄnↄ sↄ̃̀zi ń píngi kↄ̃n ↄ́ↄ dↄↄo, aↄ̃ uta kↄ̃n pↄ́kãsãa kɛ̀ Tabita kɛ̀ gurↄↄ kɛ̀ à kpɛ́ kúńyonↄ ↄ̀dↄanɛ.