ZĨRINƆ 7:16-29

¹⁶Ò sù kũ ń gɛ̀nↄo Sɛkɛmu, akũ ò ń vĩ gbɛ̀wɛɛ kũ Ibrahĩ lù mira ũ gũn Amↄ nɛ́nↄa à fĩnaa bòńnɛ kũ andurufuuo.

¹⁷Kũ lɛ́ kũ Luda sɛ̀ Ibrahĩnɛ gↄrↄ ye à ká, ó buri dasi kũ̀ à kàra Misila manamana.

¹⁸Akũ kína dufu kũ à Yusufu dↄ̃ro kpata blè Misila.

¹⁹À pãsĩ kũ ó burio à wɛ́ tã̀ ó dizinↄa, à tò ò ń nɛ́nↄ kↄ̀tɛ ò gàga.

²⁰Gↄrↄ birean ò Musa ì a àlesi mana. Ò a gwà a de bɛa mↄ aakↄ̃mɛ.

²¹Kũ ò a zùkũna, akũ Firi'auna nɛ́nↄgbɛ̃ a sɛ̀ a a gwà a zĩda nɛ́ ũ.

²²Ò Misilanↄ ↄ̃ndↄ̃ dà Musanɛ pínki, à gↄ̃̀ gbɛ̃ zↄ̃kↄ̃ ũ yã'ona kũ yãkɛnaao gũn.

²³Kũ à kà wɛ̃̀ bupla, à dà a nɛ̀sɛɛ gũn à gɛ́ a Isaraila dakenↄ gwa.

²⁴Kũ à è Misila gbɛ̃ tɛn wari dↄ a gbɛ̃ mɛ̀n doa, akũ à yã sì a gbɛ̃nɛ à fĩna bòa à a dɛ̀.

²⁵Kũ Luda ye à a gbɛ̃nↄ sura ba a gãi, àtɛn da ò dↄ̃mɛ, ama ò dↄ̃ro.

²⁶Kũ gu dↄ̀, Isaraila gbɛ̃nↄn planↄ tɛn fìti kɛ, akũ a sù à ń kpaatɛ à kútɛ kɛ̀ńnɛ à pì: Ma gbɛ̃nↄ, à kɛ̀ dera átɛn wari dↄkↄ̃a átɛ̃nɛɛ?

²⁷Akũ gbɛ̃ kũ àtɛn wari dↄ a gbɛ̃ndoa ↄ sↄ̃̀ Musai à pì: Dí mɛ́ à n kɛ kína yãgↄ̃gↄ̃ri ũwɛrɛɛ?

²⁸Ń ye ǹ ma dɛ lákũ n Misila gbɛ̃ dɛ̀ nà gĩan yá?

²⁹Kũ Musa yã pìi mà, à bàa lɛ̀ à tà Midiã bùsun. Gwen à nɛ́gↄ̃gbɛ̃nↄ ìn gbɛ̃nↄn pla.