ZĨRINƆ 5:3-38

³Ben Pita bènɛ: Anania, bↄ́yãnzin ń tò Setãn dↄ̀nnɛ aɛ lɛ sɛɛ? N n tↄↄtɛ ↄↄ kokɛ̃̀, ben n ɛgɛɛ tò Luda Nininɛ.

⁴Gurↄↄ kɛ̀ nɛ́ɛ tↄↄtɛ pì yáro, n pↄ́nloo? Kɛ̀ ń yà sↄ̃, lán ń yezi nà, nɛ́ kɛ kↄ̃n à ↄↄoroo? À kɛ̀ dia n yã beee kɛna laasuu dànguu? Èe kɛ gbɛ̃nteen n ɛgɛɛ tònɛro, Ludan ń tònɛ.

⁵Kɛ̀ Anania yã pì mà, à lɛ̀ɛ à gà. Ben vĩa gbɛ̃ kɛ̀ aↄ̃ yã pì mànↄ kũ̀ maamaa.

⁶Gↄ̃kparɛnↄ gɛ̃̀ aↄ̃ bisa dààla, ben aↄ̃ à sɛ̀ wà gàa wà à vĩ̀i.

⁷Kɛ̀ à kà lán awa aagↄ̃ↄ bà, yãke mana sai à naↄ̃ mↄ̀ à gɛ̃̀.

⁸Ben Pita à là à bè: Ǹ omɛ, a tↄↄtɛ pì yà lán kɛ̀ bàn yↄ́? À wèàla à bè: Eè, lɛmɛ.

⁹Ben Pita bènɛ: Bↄ́yãnzin a Luda Nini lɛ̀ á gwàzi? Gbɛ̃ kɛ̀ aↄ̃ n zã vĩ̀inↄ kú kpɛɛlɛ, aↄ̃é n sɛ́ wà bↄnyo se.

¹⁰Gwe gↄ̃ↄ à lɛ̀ɛ à aɛ, à gà. Kɛ̀ gↄ̃kparɛnↄ gɛ̃̀, aↄ̃ↄ è à gà, ben aↄ̃ à sɛ̀ wà gàa wà à vĩ̀i a zã saɛ.

¹¹Ben vĩa sↄsi gbɛ̃nↄ kũ̀ maamaa ń píngi kↄ̃n gbɛ̃ kɛ̀ aↄ̃ yã pì mànↄ ń píngi.

¹²Luda zĩ̀rinↄↄ e dabuyã kↄ̃n yãbↄnsaɛnↄ kɛɛ pari gbɛ̃nↄ tɛ́. Yesudeenↄ è kↄ̃kakↄ̃aa kɛ lɛdolɛ Sulemanu gbàdaan.

¹³Gbɛ̃ pãndenↄ è we wà nàḿmaro, mↄde baade píngi è ń tↄ́ nnaa sí,

¹⁴mↄde gbɛ̃ parii kɛ̀ aↄ̃ↄe Dii Yesu náanɛ kɛɛnↄ, gↄ̃gbɛ̃nↄ kↄ̃n nↄgbɛ̃nↄ ń píngi, aↄ̃ègↄ̃ kaara ń tɛ́.

¹⁵Ben wà gyãreenↄ sɛ̀ɛ kↄ̃n daɛbↄnↄ kↄ̃n gyãresɛbↄnↄ wà ń káɛ zɛ́n, lɛ tó Pita e gɛ̃tɛɛ, à ninii e à da ń gbɛ̃kenↄla yãnzi.

¹⁶Parii bↄ̀ wɛ́tɛ kɛ̀ kú Yerusalɛmu saɛnↄn wà mↄ̀ kↄ̃n gyãreenↄ kↄ̃n gbɛ̃ kɛ̀ zĩnnↄↄ e ĩa daaḿmanↄ, ben aↄ̃ kɛ̃̀kↄ̃a ń píngi.

¹⁷Ben sa'oriki kↄ̃n Sadusi gãli gbɛ̃ kɛ̀ aↄ̃ↄ dɛ à gbɛ̃ ũunↄ fɛ̀ɛ wà nↄ̀sɛgↄ̃aanↄ kpàńyo.

¹⁸Aↄ̃ zĩ̀rinↄ kũ̀kũ aↄ̃ ń ká kpɛ́siaan,

¹⁹ben Dii malaika mↄ̀ à kpɛ́ pì zɛ́ wɛ̃̀ńnɛ gwãavĩ à ń bↄ́ɛ à bè:

²⁰À gá àgↄ̃ kú Luda ua, à wɛ̃̀ndi dufu pì yã o baade pínginɛ.

²¹Zĩ̀rinↄ yã pì mà, ben aↄ̃ gàa Luda ua kↄngↄ idɛ'idɛ aↄ̃ↄe yã daańnɛ. Kɛ̀ sa'oriki kↄ̃n a gbɛ̃nↄ fɛ̀ɛ, aↄ̃ Isaraili gbãadeenↄ kↄ̃n ń gbɛ̃nsinↄ kàkↄ̃a, ben aↄ̃ dogarinↄ zĩ̀ aↄ̃ gá zĩ̀rinↄ bↄɛ kpɛ́siaan aↄ̃ mↄ́ńyo.

²²Kɛ̀ dogari pìnↄ kà gwe, aↄ̃ↄe ń e kpɛ́nlo. Ben aↄ̃ ɛ̀ara wà tà wà bèńnɛ:

²³Kɛ̀ wa ka kpɛ́ pì kiia, wá è gbànↄↄ tatana gíngin a dãkparinↄↄ kú kpɛɛlɛ, mↄde kɛ̀ wá wɛ̃̀, wée gbɛ̃ke enlo.

²⁴Kɛ̀ Luda ua dãkparinↄ gbɛ̃nsi kↄ̃n sa'orikinↄ yã pì mà, aↄ̃ bídi kɛ̀ lán yã pì dɛ nà.

²⁵Ben gbɛ̃ke mↄ̀ à bèńnɛ: À ma! Gbɛ̃ kɛ̀ a ń ká kpɛ́siaa guunↄↄ kú Luda ua aↄ̃ↄe yã daańnɛ.

²⁶Ben Luda ua dãkparinↄ kↄ̃n ń gbɛ̃nsio gàa wà ń kũkũ wà sùńyo yãkete sai, zaakɛ aↄ̃ↄe vĩa kɛɛ gbɛ̃nↄnɛ, lɛ aↄ̃ton ń pápa gbɛ̀oro yãnzi.

²⁷Kɛ̀ aↄ̃ sùńyo, aↄ̃ ń zɛ́ gbãadeenↄ aɛ, ben sa'oriki ń lála yãzi à bè:

²⁸Wa giare pátipati à yã dańnɛ kↄ̃n tↄ́ pìo, ben á tò yã pì kpɛ́ e daa Yerusalɛmula píngi, bensↄ̃ á yezi à gbɛ̃ pì ga yã diwaↄ́?

²⁹Ben Pita kↄ̃n zĩ̀ri kpaaanↄ wèńla wà bè: Luda yã bé à kↄ̃ sìo wà ma dɛ gbɛ̃ntee pↄ́la.

³⁰Wa dezinↄ Luda bé à Yesu kɛ̀ a à lògo lía á dɛ̀ pì fɛ̀ɛ.

³¹Luda à sɛ̀ à vɛ̃̀ɛ a ↄplaazi Kínɛ Mìsiri ũ, lɛ à Isarailinↄ gba zɛ́ aↄ̃ nↄ̀sɛ liɛ, à ń durunnↄ kɛ̃ńnɛ.

³²Yã pìnↄ sèedadeenↄn wa ũ, wapinↄ kↄ̃n Luda Nini kɛ̀ Luda è kpá gbɛ̃ kɛ̀ aↄ̃è a yã maanↄao.

³³Kɛ̀ aↄ̃ yã pì mà, aↄ̃ pↄ fɛ̃̀ maamaa, ben aↄ̃ↄ yezi wà ń dɛdɛ.

³⁴Farisi kɛ̀ wè benɛ Gamaliɛli kú ń tɛ́. Ludayãdannɛrimɛ, baade píngi è à tↄ́ nnaa sí. À fɛ̀ɛ à zɛ̀ à bè wà bↄ kↄ̃n gbɛ̃ pìnↄo gĩa.

³⁵Ben à bèńnɛ: Isarailinↄ, à làakari kɛ yã kɛ̀ á yezi à kɛ gbɛ̃ pìnↄnɛa.

³⁶À gurↄↄ e gì kɛro kɛ̀ Tuda fɛ̀ɛ èe a zĩnda diɛɛ a ka. Wà tɛ̀zi lán gↄ̃ↄn wàa plaaa bà. Kɛ̀ wà à dɛ̀, ben à ìbanↄ fã̀akↄ̃a, ben yã yã̀a.

³⁷À gbɛra Galili gbɛ̃ Yudasi fɛ̀ɛ gbɛ̃narogurↄ à gbɛ̃nↄ gàɛ à nàawa pari. À gà se, ben à ìbanↄ fã̀akↄ̃a ń píngi.

³⁸Mɛ́ɛ ooare tia, àton gbɛ̃ pìnↄ yã daro, à ń tó. Tó aↄ̃ pↄyezi kↄ̃n ń yãkɛnanↄ bↄ̀ gbɛ̃ntee kiiamɛ, eé mì dɛ.