ZĨRINƆ 2:24-46

²⁴Ben Luda ga bà pòtoa à à fɛ̀ɛ, zaakɛ à zɛ́ kuu kɛ̀ ga é fↄ̃ àgↄ̃ à kũnaro.

²⁵Zaakɛ Dauda à yã ò à bè: Mɛɛ̀gↄ̃ Dii ee ma wɛ́ɛn gurↄ píngi, lán à kú ma ↄplaazi nà pↄ́ke é ma degero.

²⁶Bee yãnzin ma pↄↄ ègↄ̃ nnazi, ma nↄ̀sɛguu pù. Má tãmaa vĩ kɛ̀ ma mɛ̀ égↄ̃ kuu,

²⁷zaakɛ nɛ́ ma tó mira guuro, nɛ́ we man gbɛ̃ kɛ̀ kú adona yai kũro.

²⁸N ma da wɛ̃̀ndi zɛ́a, ma pↄnnaa égↄ̃ pana n kiia.

²⁹Ma gbɛ̃nↄ, mɛ́ fↄ̃ mà wa dezi káaku Dauda yã oare wásawasa. À gà wà à vĩ̀i à mira kú wɛ́tɛ kɛ̀n ai kↄ̃n a gbã̀ao.

³⁰À annabikɛɛ guu à dↄ̃̀ kɛ̀ Luda lù sɛ̀are à bè, é a boriinↄ doke ká à kpatan.

³¹Dauda gĩakɛ à Mɛsaya fɛɛna gaan è, ben à à yã ò à bè: Luda é à tó mira guuro, eé we à mɛ̀ yai kũro.

³²Yesu pìn Luda à fɛ̀ɛ gaan. À sèedadeenↄn wa ũ wa píngi.

³³Vɛ̃ɛna Luda ↄplaazi à à Ninii kɛ̀ à à lɛ́ gbɛ̃̀wee sì a Dea. Yã kɛ̀ ée ee bensↄ̃ ée maa tiaa dɛ Luda Nini kɛ̀ à pìsiwaa ũmɛ.

³⁴Zaakɛ èe kɛ Dauda bé à fɛ̀ɛ à gàa ludambɛro, à bè: Dii ò ma diinɛ à vɛ̃ɛ a ↄplaazi

³⁵ai àgↄ̃ à ibɛɛnↄ kɛnɛ a tinti ũ.

³⁶Isarailinↄ, àgↄ̃ dↄ̃ sãnsãn kɛ̀ Yesu kɛ̀ a à pà lían Ludaa dìɛ Dii ũ, Mɛsaya ũ dↄ.

³⁷Kɛ̀ aↄ̃ yã pì mà, à ń swɛ̃̀ zↄ̃̀, ben aↄ̃ Pita kↄ̃n zĩ̀ri kpaaanↄ là wà bè: Gbɛ̃nↄ, wé kɛ diamɛ?

³⁸Ben Pita bèńnɛ: A baade nↄ̀sɛ liɛ à batisi kɛ kↄ̃n Yesu Kirisi tↄ́o, a durunnↄ é kɛ̃awa é Luda Nini sí gbaa ũ.

³⁹Zaakɛ lɛ́ kɛ̀ Ludaa gbɛ̃̀ pì dɛ a pↄ́ ũmɛ kↄ̃n a nɛ́nↄ kↄ̃n gbɛ̃ kɛ̀ aↄ̃ↄ kú zã̀nↄ, gbɛ̃ kɛ̀ Dii wa Luda é ń sísi pìnↄ ń píngi.

⁴⁰À yã pãndenↄ òńnɛ pari à nàkↄ̃rɛḿma à bè: À a zĩnda bↄ tↄ̃ↄrigbɛ̃ zaaa kɛ̀nↄ tɛ́.

⁴¹Ben gbɛ̃ kɛ̀ aↄ̃ à yã pì sìnↄ batisi kɛ̀. Zĩ beeean wà kàara ń tɛ́ gↄ̃ↄn bↄrↄ aagↄ̃.

⁴²Aↄ̃ làakari dↄ̀ zĩ̀rinↄ yãdannɛnaa kↄ̃n kↄ̃gbɛ̃kɛnao kↄ̃n Dii pↄ́blenao kↄ̃n aduakɛnao.

⁴³Zĩ̀ri pìnↄↄ e sèeda kↄ̃n yãbↄnsaɛnↄ kɛɛ, ben vĩa baade píngi kũ̀.

⁴⁴Dii náanɛkɛrinↄ píngi gãli dↄ̃nkↄ̃mɛ. Pↄ́ kɛ̀ aↄ̃ↄ vĩinↄ gↄ̃̀ aↄ̃ píngi pↄ́ ũ.

⁴⁵Tó aↄ̃ ń pↄ́ kɛ̀ aↄ̃ↄ vĩinↄ yà, aↄ̃è à ↄↄ kpaatɛtɛkↄ̃nɛ lán baade bↄkↄ̃tɛ dɛ nà.

⁴⁶Lán guu e dↄↄ nà aↄ̃ègↄ̃ kↄ̃ kaakↄ̃a Luda ua, aↄ̃ègↄ̃ pↄ́ blee kↄ̃ bɛ kↄ̃n pↄnnaao kↄ̃n nↄ̀sɛo do.