ZĨRINƆ 20:15-38

¹⁵Kɛ̀ guu dↄ̀, wa bↄ gwe kↄ̃n góro'itɛo wa gaa Kio. Gu sìa dↄnao wa gaa Samↄ, ben à gurↄ aagↄ̃dee zĩn wa ka Milɛtu.

¹⁶Pↄlu zɛ̀o yã à dↄ Ɛfesuzi lɛ gurↄↄ tón gɛ̃a Asia bùsunlo yãnzi, zaakɛ èe wãa lɛ à e à ká Yerusalɛmu ai Pɛntikↄsi zĩbaa gↄ̃ kámɛ, tó eé sí kɛ.

¹⁷Pↄlu gbɛ̃nↄ zĩ̀ sↄsi gbɛ̃nsinↄa Ɛfesu à bè aↄ̃ mↄ́ Milɛtu.

¹⁸Kɛ̀ aↄ̃ kà, ben à bèńnɛ: Á dↄ̃ lán mɛɛ̀ kɛ nà gurↄↄ kɛ̀ má kúao zaa zĩ kɛ̀ ma gbá pɛ̀ɛ Asia bùsun kɛ̀.

¹⁹Ma zĩi kɛ̀ Diinɛ zĩndabusana guu kↄ̃n wɛ́ɛ'io. Ma nawɛ̃a kɛ̀ Yudanↄ lɛ́kpakↄ̃sↄ̃namazi yãnzi.

²⁰Mɛ́ɛ kaarana yãke utɛarero, ma waazi kɛ̀are má dàare gupuraaa kↄ̃n a bɛɛnↄ.

²¹Ma lɛ́ dà Yudanↄa kↄ̃n Girikinↄ ń píngi aↄ̃ aɛ dↄ Ludaa aↄ̃ wa Dii Yesu náanɛ kɛ.

²²Tia sa mɛ́ɛ gaa Yerusalɛmu lán Luda Nini ma dan nà, yã kɛ̀ eé ma le gwe má dↄ̃ro.

²³Wɛ́tɛ kↄ̃n wɛ́tɛo Luda Ninii e oomɛ kpɛ́sia kↄ̃n wɛ́ɛtãmmanao e ma dãa.

²⁴Mↄde ma wɛ̃̀ndi bɛ̀ɛ vĩmɛ dↄro, séde mà yã kɛ̀ mɛ́ɛ pɛɛa le mà zĩi kɛ̀ Dii Yesu dàmɛɛ kɛ mà à mì dɛ. Àmbe Luda gbɛ̃kɛ baarunnakpana gbɛ̃nↄnɛ ũ.

²⁵Amↄa kɛ̀ ma lili ò a tɛ́ ma kpata kɛ̀ bↄ̀ Luda kiia waazi kɛ̀areenↄ, má dↄ̃ tia sa kɛ̀ wé wɛ́ɛ sikↄ̃lɛ dↄro.

²⁶Beee yãnzi má òare gbã̀a, tó a gbɛ̃ke sã̀sã, ma yãn beee ũ dↄro.

²⁷Ma Luda pↄyezi píngi òare, mɛ́ɛ à ke utɛarero.

²⁸À làakari dↄ a zĩndaa kↄ̃n sãa kɛ̀ Luda Nini a diɛ ń gbɛ̃nsi ũunↄ ń píngi. À Luda sↄsi gbɛ̃ kɛ̀ à ń lú kↄ̃n a zĩnda aruo pìnↄ gwa.

²⁹Má dↄ̃ kɛ̀ ma tana gbɛra lɛwan pãsĩ kɛ̀ aↄ̃ↄ sãanↄ wɛ̃nda vĩroonↄ é si a tɛ́.

³⁰Baa a gbɛ̃kenↄ é fɛɛ wà yãlɛkpɛɛ dańnɛ, lɛ wà gbɛ̃nↄ gá wà naḿma.

³¹Beee yãnzi àgↄ̃ kú a làakaria. Lán ma lɛ́ dà a baadea kↄ̃n wɛ́ɛ'io nà fãantɛ̃ kↄ̃n gwãavĩo wɛ̃̀ aagↄ̃ↄ dagura kámmabosai, à tó à yã gↄ̃ dↄagu.

³²Tia sa mɛ́ɛ a naa Ludanɛ a ↄzĩ kↄ̃n à gbɛ̃kɛ yã kɛ̀ eé fↄ̃ à gbãaa kaaraareeo, à a gba zɛ́ lɛ a baka gↄ̃ kú kↄ̃n à gbɛ̃nↄ ń píngi.

³³Mɛ́ɛ gbɛ̃ke ↄↄ ke à pↄ́kãsã ke ni dɛro.

³⁴Á dↄ̃ a zĩndanɛ kɛ̀ ma zĩi kɛ̀ kↄ̃n ma zĩnda ↄↄomɛ, ben ma pↄ́ kɛ̀ wá à nii vĩ kↄ̃n ma gbɛ̃nↄo è.

³⁵Má ↄ̀dↄaare à píngi guu à zĩi kɛ lán kɛ̀ bà à gbãasaideenↄ ĩan ká. Yã kɛ̀ Dii Yesu ò gↄ̃ dↄagu kɛ̀ à bè gbadana pↄnnaa vĩ dɛ gbasinala.

³⁶Yãbee'ona gbɛra à kùɛ a kosooa kↄ̃n ń baade píngio à adua kɛ̀.

³⁷Aↄ̃ wɛ́ɛ'i kàn ń píngi aↄ̃ mlɛ̃̀mlɛ̃ Pↄlua aↄ̃ lɛ́ pɛ̀pɛa.

³⁸Yã kɛ̀ tò aↄ̃ pↄↄ sia kũ̀ bíta bé à dɛ kɛ̀ à bè ń wɛ́ɛ é sikↄ̃lɛ dↄroo ũ. Ben aↄ̃ zɛ̀nɛ ai góro'itɛ kiia.