ZĨRINƆ 1:15-25

¹⁵Gurↄ beeea Pita fɛ̀ɛ à zɛ̀ Yesu ìba kɛ̀ aↄ̃ kà gↄ̃ↄn baswɛɛdo takanↄ tɛ́ à bè:

¹⁶Ma gbɛ̃nↄ, yã kɛ̀ Dauda ò kↄ̃n Luda Nini gbãaao Yudasi kɛ̀ dↄ̀ gbɛ̃ kɛ̀ aↄ̃ Yesu kũ̀nↄnɛ aɛ yã musu, tiasimɛ Luda yã pì papa.

¹⁷Wa gbɛ̃ndoomɛ yã à baka kú wa zĩi kɛ̀kii guu.

¹⁸À tↄↄtɛ lù kↄ̃n ↄↄ kɛ̀ à è a zaakɛna guuo. Gwen à bàkɛ̃ à lɛ̀ɛn, à gbɛɛɛ pũ̀tã à nↄaɛnↄ bↄ̀ɛ píngi.

¹⁹Yerusalɛmudeenↄ píngi yã pì mà, ben aↄ̃ tↄ́ kpà guu pìnɛ Akɛlɛdama kↄ̃n ń bori yão. Tↄ́ pì bè gbɛ̃dɛri tↄↄtɛ.

²⁰Wà à yã ò Saamu takada guu wà bè: À bɛɛ gↄ̃ bɛzĩ ũmɛ, gbɛ̃ke tóngↄ̃ kuu lɛ à vɛ̃ɛ à guu dↄro. Wà bè dↄ: Gbɛ̃ pãnde gↄ̃ à gɛ̃ɛ ũ.

²¹Bee yãnzi gbɛ̃ kɛ̀ aↄ̃ègↄ̃ tɛ́wazi gurↄↄ kɛ̀ wá lɛdo kↄ̃n Dii Yesuo zaa Yaaya gbɛ̃nↄ batisikɛgurↄ ai gurↄↄ kɛ̀ Luda à bↄ̀ wa tɛ́nↄ, wà ń gbɛ̃n doo bↄ àgↄ̃ dɛ à fɛɛna gaan sèedadee ũwao.

²³Ben wà gↄ̃ↄn plaaanↄ bↄ̀, Yusufu kɛ̀ wè benɛ Basaba wè benɛ dↄ Yusutu kↄ̃n Matiao.

²⁴Ben aↄ̃ adua kɛ̀ wà bè: Dii, ń baade píngi nↄ̀sɛ dↄ̃. Gↄ̃ↄn plaaa kɛ̀nↄ tɛ́ ǹ gbɛ̃ kɛ̀ ń bↄ̀ ↄdↄawe,

²⁵lɛ à bà gↄ̃ kú wamↄwa zĩ̀rinↄ zĩi kɛ̀kii guu yãnzi, zĩi kɛ̀ Yudasi bↄ̀n à gàa guu kɛ̀ kↄ̃ sìo guu.