ZĨRINƆ 18:1-15

¹Beee gbɛra Pↄlu bↄ̀ Atɛni à gàa Kↄrinti.

²À kpàkↄ̃a kↄ̃n Yuda keo gwe, Pↄntu bùsu gbɛ̃ kɛ̀ wè benɛ Akila kↄ̃n a naↄ̃ Pirisilao. Aↄ̃ sù kↄ̃n Itali bùsuo dufumɛ, kɛ̀ Siza Kalaudiu dìɛ Yudanↄnɛ aↄ̃ bↄɛ Romu yãnzi. Pↄlu gàa ń kiia,

³ben à pìtaḿma, èe zĩi kɛɛńyo kɛ̀ ↄzĩdↄ̃nkↄ̃kɛrinↄn ń ũ yãnzi. Zaakɛ bisakutakɛrinↄn ń ũ ń píngi.

⁴Kámmabogurↄↄ zĩ píngi è waazi kɛ aduakɛkpɛn èe wɛtɛɛ Yudanↄ kↄ̃n Girikinↄ a yãzɛ e.

⁵Kɛ̀ Silasi kↄ̃n Timↄtio bↄ̀ Masedonia bùsun aↄ̃ sù, Pↄlu zɛ̀ kↄ̃n waazikɛnao èe oo Yudanↄnɛ wásawasa kɛ̀ Yesun Mɛsaya ũ.

⁶Kɛ̀ Yudanↄ íbɛtɛ kpào aↄ̃ à sↄ̃̀sↄ̃, ben à a pↄ́kãsãanↄ kpòkɛńla à bè: Yã kɛ̀ á kɛ̀ wí a musu, ma yãn dↄro. Zaa tia mɛ́ gá bori pãndenↄ kiiamɛ.

⁷Kɛ̀ à bↄ̀ gwe, à gàa à pìta bori pãnde dↄnziri kɛ̀ wè benɛ Titiu Yusutu bɛ aduakɛkpɛ pì saɛ.

⁸Aduakɛkpɛ gbɛ̃nsi Kirisipu Dii náanɛ kɛ̀ kↄ̃n a bɛdeenↄ ń píngi. Kↄrintidee kɛ̀ aↄ̃ Pↄlu yã mànↄ Yesu náanɛ kɛ̀ pari, ben aↄ̃ batisi kɛ̀.

⁹Gwãavĩ kea Dii ò Pↄlunɛ wɛ́ɛgupu'ena guu à bè: Ǹton tó vĩa n kũro, ǹton kámma bo kↄ̃n yã'onnɛnaoro,

¹⁰zaakɛ gbɛ̃nↄↄ kú ma pↄ́ ũ pari wɛ́tɛ kɛ̀ guu. Má kúnyo, gbɛ̃ke é n kũ à ĩa dammaro.

¹¹Ben Pↄlu wɛ̃̀ do kↄ̃n mↄ swɛɛdooo kɛ̀ gwe ègↄ̃ Luda yã daa gbɛ̃nↄnɛ.

¹²Gurↄↄ kɛ̀ Romu gbɛ̃ Galio dɛ Girisi bùsu gbɛ̃nsi ũ, Yudanↄ lɛdolɛ kɛ̀, aↄ̃ fɛ̀ɛ Pↄluzi, aↄ̃ gàao yãkpaɛkɛkiia

¹³aↄ̃ bè: Àmbe e tɛ́ kaa gbɛ̃nↄn aↄ̃gↄ̃ dↄnziyã kɛ̀ pã̀ wa dokanɛ kũna.

¹⁴Kɛ̀ Pↄlu yezi à yã o, ben Galio bè Yudanↄnɛ: Yudanↄ, tó dà ke taari bíta kemɛ yã, à kↄ̃ sìo mà mɛnaao.

¹⁵Lán ée yãkete kaa gbɛ̃nↄ tↄ́ yã musu nà kↄ̃n a zĩnda dokao, beee gↄ̃̀ a yã ũmɛ. Ma gi yã beee taka kɛkɛnazi.