ZĨRINƆ 17:1-15

¹Aↄ̃ bↄ̀ɛ kↄ̃n Amfipↄlio kↄ̃n Apↄlↄniao, ben aↄ̃ kà Tɛsalonika, guu kɛ̀ Yudanↄ aduakɛkpɛ kún.

²Ben Pↄlu gɛ̃̀ aduakɛkpɛn lán à kↄ̃ dↄ̃o nà, à waazi kɛ̀ńnɛ yã kɛ̀ kɛ̃na Luda yãn musu kámmabogurↄ gɛ̃̀n aagↄ̃.

³Èe bↄkↄ̃tɛɛńnɛ lán à kↄ̃ sìo Mɛsaya wɛ́ɛtãmma e nà à fɛɛ bↄna gaan à bè: Yesu kɛ̀ mɛ́ɛ à yã ooaree bé à Mɛsaya pì ũ.

⁴Aↄ̃ gbɛ̃kenↄ yã pì zɛ́ è, ben aↄ̃ nà Pↄlu kↄ̃n Silasioa. Lɛn Giriki dↄnzirinↄ nàḿma lɛ pari se ai kↄ̃n nↄgbɛ̃ tↄ́deenↄ pari dↄ.

⁵Ben Yudanↄ nↄ̀sɛgↄ̃aanↄ kpàńyo, aↄ̃ lilipãpã'orinↄ kàkↄ̃a aↄ̃ pari kũ̀, ben aↄ̃ wɛ́tɛ lògo. Aↄ̃ gàa wà lìga Yasↄ̃ bɛɛzi, aↄ̃ↄe Pↄlu kↄ̃n Silasio wɛtɛɛ lɛ wà ń kũ wà bↄńyo gupuraaa.

⁶Kɛ̀ wèe ń ero, aↄ̃ Yasↄ̃ kↄ̃n Yesude pãndenↄ gàɛ wà bↄ̀ńyo wɛ́tɛ gbãadeenↄ kiia, aↄ̃ↄe wii lɛɛ wèe bee: Gbɛ̃ pìnↄ nɛ́ anduna gudɛrinↄmɛ. Aↄ̃ mↄ̀ kɛ̀,

⁷ben Yasↄ̃ ń díɛ a bɛ. Gbɛ̃ pìnↄↄ e pãa Siza dokanɛ ń píngi, aↄ̃è be kína pãndee kuu wè benɛ Yesu.

⁸Yã pì zↄ̃̀ gbɛ̃nↄ pↄↄa kↄ̃n wɛ́tɛ gbãadeenↄ.

⁹Ben aↄ̃ ↄↄ sì Yasↄ̃a kↄ̃n a gbɛ̃ kpaaanↄ aↄ̃ ń gbáɛ.

¹⁰Gwãavĩ beeea gↄ̃ↄ Yesudeenↄ Pↄlu kↄ̃n Silasio gbàrɛ Bɛrea. Kɛ̀ aↄ̃ kà gwe, ben aↄ̃ gɛ̃̀ Yudanↄ aduakɛkpɛn.

¹¹Gbɛ̃ beeenↄ nↄ̀sɛ maaa dɛ Tɛsalonikadeenↄla aↄ̃ Luda yã sì ↄplaplaa. Lán guu e dↄↄ nà aↄ̃ègↄ̃ Luda yã gwagwaa lɛ wà dↄ̃ tó Pↄlu yã pìnↄ yãpuraa vĩ.

¹²Aↄ̃ gbɛ̃nↄ Dii náanɛ kɛ̀ pari kↄ̃n Giriki nↄgbɛ̃ bɛ̀ɛdeenↄ kↄ̃n Giriki gↄ̃gbɛ̃nↄo pari dↄ.

¹³Kɛ̀ Tɛsalonika Yudanↄↄ mà Pↄlu e Luda yã waazi kɛɛ Bɛrea dↄ, ben aↄ̃ mↄ̀ gwe aↄ̃ yãkete dà gbɛ̃nↄ tɛ́ aↄ̃ ń pↄↄ fɛ̀ɛ.

¹⁴Ben Yesudeenↄ Pↄlu gbàrɛ gↄ̃ↄ ísiaa kpa, mↄde Silasi kↄ̃n Timↄtio gↄ̃̀ gwe.

¹⁵Gbɛ̃ kɛ̀ aↄ̃ gàa zɛ Pↄlunɛnↄ gàao Atɛni, ben aↄ̃ ɛ̀ara wà tà Silasi kↄ̃n Timↄtio kiia kↄ̃n Pↄlu lɛ́gbɛo, à bè aↄ̃ mↄ́ wà a le kpakpaa.