ZĨRINƆ 16:12-39

¹²Bↄna gwe wa gaa Filipi. Àmbe Masedonia bùsu kpadoo pì wɛ́tɛdaa ũ kɛ̀ Romudeenↄↄ vĩ. Ben wa gurↄplaa kɛ̀ wɛ́tɛ pì guu.

¹³Kámmabogurↄↄ zĩ wa bↄ wɛ́tɛ kpɛɛ, wa gaa swaa saɛ, guu kɛ̀ wá mà aduakɛkii kún. Ben wa vɛ̃ɛ wa yã ò nↄgbɛ̃ kɛ̀ aↄ̃ kakↄ̃ana gweenↄnɛ.

¹⁴Nↄgbɛ̃ kee kú gwe wè benɛ Lidia. Tiatira gbɛ̃mɛ, bisa wɛ́ɛ tɛ̃a búgu yàrimɛ, bensↄ̃ Luda dↄnzirimɛ. Èe yã kɛ̀ Pↄlu e oo maa, ben Dii a swɛ̃̀ wɛ̃̀nɛ à yã pì sì.

¹⁵À batisi kɛ̀ kↄ̃n a bɛdeenↄ, ben à wɛ́ɛ kɛ̀wa à bè: Tó a ma Dii náanɛkɛna sì, à mↄ́ à pita ma bɛ. Ben wa à yãzɛ è.

¹⁶Zĩkea kɛ̀ wée gaa aduakɛkiia, wa dakↄ̃rɛ kↄ̃n zↄ̀nↄgbɛ̃ kɛ̀ mlɛ̃̀ tãa vĩio. À diinↄ è ↄↄ e maamaa à ziayã'onnɛna musu.

¹⁷Ben à bↄ̀ à tɛ́wazi, wapinↄ kↄ̃n Pↄluo, èe wii lɛɛ à bè: Gbɛ̃ kɛ̀nↄ nɛ́ Luda Musude zↄ̀blerinↄmɛ, aↄ̃ↄe mìsina zɛ́ kpàakpa kɛɛare.

¹⁸Ègↄ̃ kɛɛ lɛ lán guu e dↄↄ nà, ben yã pì Pↄlu ã̀'ã. À lìɛ à bè zĩn pìnɛ: Má ònnɛ kↄ̃n Yesu Kirisi tↄ́o ǹ goa. Ben à gòa gↄ̃ↄ.

¹⁹Kɛ̀ à diinↄ dↄ̃ ń àre'ena à yã musu tãmaa yã̀a, ben aↄ̃ Pↄlu kↄ̃n Silasio kũ̀ aↄ̃ ń gáɛ wà gàańyo gbãadeenↄ kiia yàra guu.

²⁰Aↄ̃ gàańyo yãkpaɛkɛrinↄ kiia aↄ̃ bè: Gbɛ̃ kɛ̀nↄ nɛ́ Yudanↄmɛ, aↄ̃ↄe wa wɛ́tɛ yakaawe.

²¹Fɛɛakaarayã kɛ̀ wa Romudeenↄ doka gì wà sí ke wà kɛɛn aↄ̃ↄe daańnɛ.

²²Parii fɛ̀ɛńzi, ben yãkpaɛkɛri pìnↄ bè wà ń pↄ́nↄ pitiḿma wà ń lɛ́lɛ gòo.

²³Kɛ̀ wà gbɛ̃na maaa kɛ̀ńnɛ, ben wà ń dá kpɛ́siaan wà bè kpɛ́ pì dãkparinɛ à ń dãkpa maamaa.

²⁴Kɛ̀ wà ònɛ lɛ, ben à ń dá kpɛ́tu à ń gbánↄ dà lín gíngin.

²⁵Lezãndo Pↄlu kↄ̃n Silasio e adua kɛɛ aↄ̃ↄe lɛ̀ sii Ludanɛ, gbɛ̃ kpaaanↄↄ e swã kpaa ń yãzi.

²⁶Kãndo tↄↄtɛ nìgãnigã kↄ̃n gbãaao ai kpɛ́ pì gũ̀nↄ dège. Gwe gↄ̃ↄ à gbànↄ wɛ̃̀wɛ̃ píngi, ben pisinanↄ mↄ̀kyakoonↄ bↄ̀ɛḿma píngi.

²⁷Kɛ̀ kpɛ́ dãkpari pì vù, à gbànↄ è wɛ̃wɛ̃na píngi, ben à a fɛ̃ɛdaa wòto à yezi à a zĩnda dɛ, zaakɛ èe daa pisinanↄ bàa sìmɛ.

²⁸Ben Pↄlu pũ̀tã kↄ̃n kòto gbãaao à bè: Ǹton n zĩnda kari kɛro. Wá kú kɛ̀ wa píngi.

²⁹Kpɛ́ dãkpari pì bè wà mↄ́ fitiao, ben à sì ń tɛ́ kↄ̃n bào à kùɛ Pↄlu kↄ̃n Silasio aɛ èe lugalugaa.

³⁰À bↄ̀ńyo bàazi, ben à bè: Mareenↄ, dian mɛ́ kɛ mà mìsina ee?

³¹Aↄ̃ bènɛ: Ǹ Dii Yesu náanɛ kɛ, nɛ́ mìsina e, mpi kↄ̃n n bɛdeenↄ a píngi.

³²Ben aↄ̃ Dii yã ònɛ kↄ̃n a bɛdeenↄ ń píngi.

³³Lezãndo beeean kpɛ́ dãkpari pì ń sɛ́ à gàa à ń bↄ̀nↄ pìpińnɛ, ben à batisi kɛ̀ gↄ̃ↄ kↄ̃n a gbɛ̃nↄ ń píngi.

³⁴Ben à gɛ̃̀ńyo a bɛ à pↄ́blee kɛ̀ńnɛ. Àpi kↄ̃n a bɛdeenↄ pↄↄ kɛ̀ nna maamaa kɛ̀ aↄ̃ Luda náanɛ kɛ̀ yãnzi.

³⁵Kɛ̀ guu dↄ̀, yãkpaɛkɛrinↄ dogarinↄ zĩ̀ aↄ̃ gá onɛ à gbɛ̃ pìnↄ gbarɛ.

³⁶Ben kpɛ́ dãkpari pì bè Pↄlunɛ: Yãkpaɛkɛrinↄ gbɛ̃nↄ zĩ̀ma lɛ mà a gbarɛ. À bↄɛ à tá aafia.

³⁷Ben Pↄlu bè dogari pìnↄnɛ: Aↄ̃ wa gbɛ̃ gbɛ̃nↄ wáa yãkpaɛkɛnawao sai aↄ̃ wa da kpɛ́siaan, wamↄwa kɛ̀ Romudeenↄn wa ũ. Tia sa aↄ̃ↄ yezi wà wa bↄɛ asii guuↄ́? O'o! Auo! Séde aↄ̃ mↄ́ wà wa bↄɛ ń zĩnda.

³⁸Dogari pìnↄ yã pì gbã̀ yãkpaɛkɛrinↄnɛ. Kɛ̀ aↄ̃ↄ mà Romudeenↄn ń ũ, ben vĩa ń kũ.

³⁹Ben aↄ̃ mↄ̀ wà agbaa kpàńnɛ wà ń bↄ́ɛ kpɛ́siaan, ben wà wɛ́ɛ kɛ̀ḿma aↄ̃ bↄńnɛ ń wɛ́tɛ guu.