ZĨRINƆ 15:20-33

²⁰Wà takada kɛ̃ńnɛ aↄ̃ mì kɛ̃ tãa pↄ́bleea kↄ̃n pãpãkɛnao kↄ̃n nↄ̀bↄ kòtokpasaio kↄ̃n aruo.

²¹Zaakɛ à gì kɛ̀ kɛ̀ wègↄ̃ Musa takada kyó kɛɛ aduakɛkpɛnↄ guu kámmabogurↄↄ zĩ píngi wègↄ̃ à doka waazi kɛɛ wɛ́tɛ kↄ̃n wɛ́tɛo.

²²Ben zĩ̀rinↄ kↄ̃n gbɛ̃nsinↄ kↄ̃n sↄsi gbɛ̃nↄ píngi zɛ̀o wà gbɛ̃nↄ bↄ ń tɛ́ wà ń zĩ Antiↄku kↄ̃n Pↄluo kↄ̃n Banabao. Ben aↄ̃ ń aɛde kenↄ bↄ̀, Yudasi kɛ̀ wè benɛ Basaba kↄ̃n Silasio.

²³Wà ń zĩ láo, yã kɛ̀ wà kɛ̃̀ à guun yɛ̀: Wamↄwa zĩ̀rinↄ kↄ̃n gbɛ̃nsinↄ wa ì kpà amↄa wa gbɛ̃ kɛ̀ aↄ̃ↄ dɛ bori pãnde ũunↄa zaa Antiↄku kↄ̃n Siria bùsuo kↄ̃n Silisia bùsuo.

²⁴Wá mà wa gbɛ̃kenↄ gàa a kiia wa lɛ́ saɛ, aↄ̃ a nↄ̀sɛ yàkaare aↄ̃ a da bídin ń yã'ona guu.

²⁵Ben wa lɛdolɛ kɛ̀ wa zɛo kɛ̀ wà gbɛ̃nↄ bↄ wà ń zĩawa kↄ̃n wa gbɛ̃ yenzideenↄ Banaba kↄ̃n Pↄluo

²⁶kɛ̀ aↄ̃ gì ń wɛ̃̀ndizi wa Dii Yesu Kirisi tↄ́bↄna yãnzi.

²⁷Beee yãnzi wée Yudasi kↄ̃n Silasio zĩiawa, lɛ aↄ̃ yã kɛ̀ wá kɛ̃̀ lán oare kↄ̃n lɛ́o.

²⁸Zaakɛ Luda Nini kↄ̃n wapinↄ wa zɛo wàton aso ke diarero, séde pↄ́ kɛ̀ zɛ́ vĩi kɛ̀kiinↄ.

²⁹À mì kɛ̃ nↄ̀bↄ kɛ̀ wà saa òo tãaaa kↄ̃n aruo kↄ̃n nↄ̀bↄ kòtokpasaio kↄ̃n pãpãkɛnao. À maa à mì kɛ̃ beeenↄa. Wà kↄ̃ e aafia!

³⁰Ben wà ń gbáɛ aↄ̃ gàa Antiↄku. Aↄ̃ sↄsi gbɛ̃nↄ kàkↄ̃a ń píngi, ben aↄ̃ lá pì kpàḿma.

³¹Kɛ̀ aↄ̃ à kyó kɛ̀, ben aↄ̃ pↄↄ kɛ̀ nna maamaa kↄ̃n nↄ̀sɛyĩikũyã pìo.

³²Yudasi kↄ̃n Silasio nɛ́ annabinↄmɛ, ben aↄ̃ lɛ́ dà ń gbɛ̃ pìnↄa maamaa aↄ̃ ń gbá gbãaa.

³³Kɛ̀ aↄ̃ gurↄplaa kɛ̀ gwe, Yesudeenↄ lɛ́ zàḿma, ben aↄ̃ tà ń zĩ̀rinↄ kiia aafia.