ZĨRINƆ 15:11-26

¹¹Lɛnlo! Ó sì kũ óni surabana le Dikiri Yesu gbɛ̃kɛ yãi lán mↄ́kↄ̃nↄ bà se.

¹²Gbɛ̃nↄ kɛ̀ kítikiti ń pínki, akũ ò sã kpà Baanaba kũ Pↄluooi, òtɛn sèedanↄ kũ daboyã kũ Luda kɛ̀ ń gãi buri pãndenↄ tɛ́nↄ ońnɛ.

¹³Kũ ò yã ò ò làka, Yamisi fùtɛ à yã ò à pì: Ma gbɛ̃nↄ, à ma yã ma.

¹⁴Simↄ ò lákũ Luda wɛ́ pã̀ buri pãndenↄla káaku nà à gbɛ̃nↄ sɛ̀ ń tɛ́ a pↄ́ ũ.

¹⁵Annabinↄ yãnↄ kↄ̃ sɛ̀ kũ abireo, zaakũ ò pì:

¹⁶Abire gbɛra mani ɛra mà su mà Dauda bɛzĩ bo, mani a guforo kɛkɛ mà tata mà a futɛ,

¹⁷de bisãsiri kparanↄ ma ki wɛtɛ, buri pãnde gbɛ̃ kũ ma tↄ́ kúḿma pìnↄ ń pínki. Dikiri kũ àtɛn yã pì kɛ mɛ́ à ò,

¹⁸àkũ mɛ́ à tò ò yã pì dↄ̃ zaa káaku.

¹⁹A yã mɛ́ à tò ma è à mana ò yã kũ à zĩ'ũ ditɛ buri pãnde kũ òtɛn arɛ dↄ Ludaanↄnɛro.

²⁰Ò takada kɛ̃ńnɛ ò mì kɛ̃ tãna pↄ́blea kũ pãpãkɛnaao kũ nↄ̀bↄ kùtukpanasario kũ aruo.

²¹Zaakũ à gìi kɛ̀ kũ òdigↄ̃ Musa takada kyó kɛ aduakɛkpɛnↄ gũn kámmabogↄrↄ zĩ pínki òdigↄ̃ a doka waazi kɛ wɛ̃tɛ kũ wɛ̃tɛo.

²²Akũ zĩ̀rinↄ kũ gbɛ̃ zↄ̃kↄ̃nↄ kũ sↄsi gbɛ̃nↄ pínki zɛ̀o ò gbɛ̃nↄ bo ń tɛ́ ò ń zĩ Antiↄku kũ Pↄluo kũ Baanabao. Akũ ò ń arɛde kenↄ bò, Yudasi kũ òdi pinɛ Baasaba kũ Silasio.

²³Ò ń zĩ kũ takadao, yã kũ ò kɛ̃̀ a gũnn dí: Ókↄ̃nↄ zĩ̀rinↄ kũ gbɛ̃ zↄ̃kↄ̃nↄ o fↄ kpà ákↄ̃nↄ ó gbɛ̃ kũ ò de buri pãnde ũnↄa zaa Antiↄku kũ Siria bùsuuo kũ Silisia bùsuuo.

²⁴O mà ó gbɛ̃kenↄ gɛ̀ɛ á kĩnaa ó lɛ́ sari, ò á nɛ̀sɛɛ yàkaárɛ ò á dá bídin ń yã'onaa gũn.

²⁵Akũ o lɛ́dokↄ̃nↄ kɛ̀ o zɛo kũ ò gbɛ̃nↄ bo ò ń zĩáwa kũ ó gbɛ̃ yenyĩdenↄ Baanaba kũ Pↄlu

²⁶kũ ò gì ń wɛ̃̀ndiii ó Dikiri Yesu Kirisi tↄ́bona yãiio.