ZĨRINƆ 14:1-26

¹Aↄ̃ↄ kɛ̀ Ikↄniu lán aↄ̃ↄ kↄ̃ dↄ̃o nà, aↄ̃ gɛ̃̀ Yudanↄ aduakɛkpɛn aↄ̃ yã ò ai Yudanↄ kↄ̃n bori pãndenↄ Dii náanɛ kɛ̀ paripari.

²Ben Yuda kɛ̀ aↄ̃ gì yã pì sízinↄ bori pãndenↄ swã gbã̀gbã Yesudeenↄnɛ aↄ̃ íbɛtɛ kpàńyo.

³Baa kↄ̃n beeeo Pↄlu kↄ̃n Banabao gurↄplaa kɛ̀ gwe aↄ̃ Dii yã ò kↄ̃n kùgbãaao, ben Dii ń gbá zɛ́ aↄ̃ sèedanↄ kↄ̃n dabuyãnↄ kɛ̀, kɛ̀ yãpuraa kpà a gbɛ̃kɛyã kɛ̀ aↄ̃ↄe ooa.

⁴Ben wɛ́tɛdeenↄ kɛ̃̀kɛ̃kↄ̃a, gbɛ̃kenↄ zɛ̀ kↄ̃n Yudanↄ, gbɛ̃kenↄ sↄ̃ kↄ̃n zĩ̀rinↄ.

⁵Ben Yudanↄ kↄ̃n bori pãndenↄ kↄ̃n ń gbãadeenↄ zɛ̀o wà wɛ́ɛ tãḿma wà ń pápa gbɛ̀o.

⁶Kɛ̀ Pↄlu kↄ̃n Banabao ń yã dↄ̃̀, ben aↄ̃ bàa sì wà tà Likaonia bùsu wɛ́tɛnↄ guu, Lisitira kↄ̃n Dɛbio kↄ̃n ń lakutunↄ.

⁷Ben aↄ̃ↄ kpɛ́ wèe baaru nnaa pì kpaańnɛ gwe.

⁸Gↄ̃gbɛ̃ kee kú Lisitira à gbánↄↄ fɛ̃fɛ̃na. Zaa lán wà à ì nà ɛrɛmɛ, èe táa o zikiro.

⁹Èe swã kpaa Pↄlu yãzi, ben Pↄlu wɛ́ɛ pɛ̀a tíii, à è à ludanaanɛkɛna kà à à kɛ̃kↄ̃a,

¹⁰ben à bènɛ kↄ̃n kòto gbãaao: Ǹ fɛɛ ǹ zɛ n gbáa. Ben à vĩ̀ à zɛ̀ à nà táa'onaa.

¹¹Kɛ̀ gbɛ̃nↄↄ è lán Pↄlu kɛ̀ nà, ben aↄ̃ wiii kàkũn kↄ̃n Likaonia yão wà bè: Tãanↄ lì gbɛ̃nteenↄ ũ aↄ̃ pìtawa.

¹²Aↄ̃ tↄ́ kpà Banabanɛ Zusu, Pↄlu sↄ̃ Ɛmɛsi kɛ̀ àmbe è dↄńnɛ aɛ kↄ̃n yã'onao yãnzi.

¹³Zusu pì kpɛ́ kú wɛ́tɛ kpɛɛ, ben à gbã̀gbãri mↄ̀ kↄ̃n zùswaree kɛ̀ wà lávu zãblebↄ kɛ̀ńnɛnↄo wɛ́tɛ bĩilɛa. À yezi gbɛ̃nↄ saa oo zĩ̀rinↄa.

¹⁴Kɛ̀ Banaba kↄ̃n Pↄluo yã pì mà, aↄ̃ ń utanↄ gà wà kɛ̃̀kɛ̃, ben aↄ̃ sì gbɛ̃nↄ tɛ́ kↄ̃n wiiio

¹⁵wà bè: Gbɛ̃nↄ, bↄ́yãnzi ée kɛɛ lɛzi? Gbɛ̃nteenↄn wa ũ se lán a bà. Baaru nnaan wée kpaaare, lɛ à kpɛɛ li pↄ́ gina kɛ̀nↄnɛ à aɛ dↄ Luda Wɛ̃̀ndidea. Àmbe à musu kɛ̀ kↄ̃n tↄↄtɛo kↄ̃n ísiaao kↄ̃n pↄ́ kɛ̀ kú à guunↄ píngi.

¹⁶À bori píngi tò yã aↄ̃ ń zĩnda zɛ́ sɛ̀.

¹⁷Baa kↄ̃n beeeo à a zĩnda ↄ̀dↄaare maakɛna guu. È tó lou maare lɛ à pↄ́ kɛ̃ a gurↄↄa. È a gba pↄ́ble bíta lɛ àgↄ̃ kú pↄnnaa guu.

¹⁸Baa kↄ̃n yãbee'onao, ↄsi kↄ̃n ↄsiio aↄ̃ gbasa wà gì gbɛ̃nↄnɛ wà saa oḿma.

¹⁹Ben Yudanↄ bↄ̀ Antiↄku kↄ̃n Ikↄniuo aↄ̃ mↄ̀ wà gbɛ̃nↄ swã gbã̀gbã. Ben aↄ̃ Pↄlu pàpa gbɛ̀o aↄ̃ à gàɛ wà bↄ̀o wɛ́tɛ kpɛɛ, aↄ̃ↄe daa à gàmɛ.

²⁰Kɛ̀ Yesudeenↄ kàkↄ̃azi, ben à fɛ̀ɛ à gɛ̃̀ wɛ́tɛ guu. Kɛ̀ guu dↄ̀, àpi kↄ̃n Banabao gàa Dɛbi.

²¹Kɛ̀ aↄ̃ baaru nnaa kpàńnɛ wɛ́tɛ pì guu, aↄ̃ gbɛ̃nↄ è pari. Ben aↄ̃ ɛ̀ara wà gàa Lisitira kↄ̃n Ikↄniuo kↄ̃n Antiↄkuo,

²²aↄ̃ↄe Yesudeenↄ gbaa gbãaa, aↄ̃ↄe lɛ́ daaḿma aↄ̃ zɛ gbãa Yesu náanɛkɛna guu wà bè: Séde wà nawɛ̃a kɛ maamaa gĩa, gbasa wà gɛ̃ kpata kɛ̀ bↄ̀ Luda kiia guu.

²³Aↄ̃ gbɛ̃nsinↄ dìɛńnɛ sↄsi kↄ̃n sↄsio, ben aↄ̃ adua kɛ̀ńnɛ kↄ̃n lɛ́yinao aↄ̃ ń ná Dii kɛ̀ aↄ̃ à náanɛ kɛ̀ ↄzĩ.

²⁴Kɛ̀ aↄ̃ bↄ̀ɛ Pisidia bùsu kpa, ben aↄ̃ kà Pamfilia bùsun.

²⁵Aↄ̃ Luda yã ò Pɛga, ben aↄ̃ gàa Atalia.

²⁶Gwen aↄ̃ gɛ̃̀ góro'itɛn, aↄ̃ tà Antiↄku, guu kɛ̀ wà ń ná Ludanɛ a ↄzĩ yã, lɛ à gbɛ̃kɛɛ kɛńnɛ zĩi kɛ̀ aↄ̃ↄ kɛ̀ wà yã̀a tia yã musu.