ZĨRINƆ 11:19-29

¹⁹Wɛ́ɛtãmmana kɛ̀ fɛ̀ɛ Sitivĩ gaa gbɛra bé à tò gbɛ̃nↄ fã̀akↄ̃a wà tà Fenisia bùsun kↄ̃n Sipiru bùsuo kↄ̃n Antiↄkuo, aↄ̃ↄe Luda yã oo Yudanↄnɛ ńtɛ̃ɛ.

²⁰Mↄde aↄ̃ gbɛ̃ kenↄ nɛ́ Sipiru bùsu kↄ̃n Sirɛni bùsuo gbɛ̃nↄnɛ, ben aↄ̃ gàa Antiↄku aↄ̃ↄe yã oo bori pãndenↄnɛ se dↄ, aↄ̃ↄe Dii Yesu baaru nnaa kpaańnɛ.

²¹Dii e ↄ daaḿma, ben gbɛ̃nↄ yã pì sì pari aↄ̃ aɛ dↄ̀ Diia.

²²Ben yã pì baaru kà Yerusalɛmu sↄsi gbɛ̃nↄ kiia, ben aↄ̃ Banaba zĩ̀ Antiↄku.

²³Kɛ̀ à kà gwe, à è lán Luda aubarika kɛ̀ńnɛ nà, ben à pↄↄ kɛ̀ nna. À lɛ́ dàḿma ń píngi aↄ̃ zɛ kↄ̃n Diio kↄ̃n nↄ̀sɛo do.

²⁴Banaba nɛ́ gbɛ̃ maaamɛ, Luda Nini kↄ̃n ludanaanɛkɛnao pɛ̀kↄ̃rɛa, ben wà kàara Dii gbɛ̃nↄ guu pari.

²⁵Ben Banaba gàa Taasu lɛ à Solu wɛtɛ.

²⁶Kɛ̀ à à è, ben à sùo Antiↄku. Aↄ̃ègↄ̃ kaakↄ̃a kↄ̃n sↄsi gbɛ̃nↄ paripari aↄ̃gↄ̃ yã daańnɛ ai wɛ̃̀ do papana. Antiↄku gwen wà Yesu ìbanↄ sìsin Yesudeenↄ ũ káaku.

²⁷Gurↄ beeean annabinↄ bↄ̀ Yerusalɛmu aↄ̃ mↄ̀ Antiↄku.

²⁸Aↄ̃ gbɛ̃ kɛ̀ wè benɛ Agabu fɛ̀ɛ à zɛ̀ à gĩakɛ à dekaa bíta kɛ̀ eé ká anduna guu píngi yã òńnɛ kↄ̃n Luda Nini gbãaao. Kalaudiu kíblena gurↄn dekaa pì kà.

²⁹Ben Yesudeenↄ zɛ̀o wà ń gbɛ̃ kɛ̀ aↄ̃ↄ kú Yudeanↄ kámasa kɛ lán baade gbãaa kà nà wà kpãsãńnɛ.