Zân 9:8-21

⁸am notnane ma am notnaŋ mânep milawatgat mawekumindame ektemien ekŋenaŋ ekti ilinak dopmaŋ yaŋkwesim yaŋkwesim mti zewien, “An kapi selen totati nin mânep milawatgat mawekumndain wan an kapi?”

⁹Âpme am notnaŋ ekŋenaŋ zewien, “An ikŋaŋ kapimak,” zeme notnaŋaŋ, “Yegat,” zemti, “An kapimak ŋenmak egat sepemit kwepgat.” Kegok zeme an ikŋaŋ keyaŋ pigok zeye, “Nenen mânep milawatgat mawekumindayap kemak.”

¹⁰Zeme pigok yaŋkwesiwien, “Geŋ zigok mti zikadi ekdak?”

¹¹Yaŋkwesime pigok diindoye, “An ŋen kwitnaŋ Zisas an keyaŋ zawakŋaŋmak msatmak lumaŋti zikatn sâkŋan gwaen kaput nemti pigok dinop, ‘Geŋ Siloam tu lemuŋan meti witilip zulupmane melak’ zemnep. Âpme neŋ meti zikatn sâkŋanen witilip kaputnep ke zulupma mepme zikatn pembenaŋ beme ega.”

¹²Kegok zeme pigok yaŋkwesiwien, “An ke deset tazin ke geŋ nânik?” Yaŋkwesime zeye, “An ke pe deset tazin ke neŋ ku nâyap.”

¹³Âpme am ekŋenaŋ an zikatnaŋ ege ke Palisimagen wati mebien.

¹⁴Zisasiyaŋ an zikatnaŋ zawakŋaŋmak msatmak lumaŋti zikatnaŋ weyaŋpeye ke Sabat tagoŋgo kanen mge keyepmti wati mebien.

¹⁵Mepme Palisi an ekŋenaŋ ewe pigok yaŋkwesiwien, “Geŋ zikadi pe zigok mti ekdak?” Yaŋkwesime pigok diindoye, “Neŋ msalaŋ zikatnan zulutneme met tuyen zuluti zikatn ega.”

¹⁶Zeme Palisi ekŋenmagengatnaŋ an notnaŋaŋ pigok zewien, “An zikadi weyaŋpeye ek Kawawaŋgalen mulup an yek. Keyepmti nin Sabat tagoŋgo kanen ke tapmann egaŋ tagoŋgo sutnan penaŋ mulup mip.” Zeme notnaŋaŋ pigok zewien, “Ek a yomtoŋ mamanak ze egaŋ mulup keboŋ ke zigok mnak?” Kegok zemti ilinak zet mmot mtot mbien.

¹⁷Mti an zikatnaŋ beŋaŋ weyaŋpeye ek sek tuk ewe pigok yaŋkwesiwien, “An zikadi weyaŋgep an keyet geŋ zigok nâmpenik?” Yaŋkwesime egaŋ pigok zeye, “An ke neŋ nâmpema golaŋ zenze an ŋen bein.”

¹⁸Âpme Zuda amobotnaŋ ekŋenaŋ an kapi pe zikatnaŋ beŋaŋ kapuk sokbeye. Zemti keŋ zut mbienaŋ yek beme mamaŋ bipmaŋ idazemtetime kopmalu pigok idayaŋkwesiwien,

¹⁹“Nemuŋit kapi ilak penaŋ zikatnaŋ beŋaŋ sokbeye? Ek zigok mti zikatnaŋ egap ke it bugan nâlup?”

²⁰Idayaŋkwesime mambipmanelaŋ pigok zewun, “Ek nigat nemunit penaŋ okakŋanak zikatnaŋ beŋaŋ sokbeye e nit ŋep nâlup.

²¹Yaŋgut naman zigok mti zikatnaŋ egap ma an kwiyaŋ zikatnaŋ weyaŋpep ke nit ku nâlup. Ek ilak an temaŋ kwitnaŋ kwitnaŋ ikŋaŋ nâmâtâtâtnaŋmak keyet ikŋaŋ weyaŋ yaŋkwesime diindome nâit!”