Yuhanna 7:3-28

³Miɲiraaɓe Iisaa worɓe mbii ɗum: —Eggu, njahaa Yahuudiya yalla taalibaaɓe maa ɓee ana njiya golleeji ɗi ngollataa ɗii.

⁴Fay gooto suuɗataa ko gollata so ana yiɗi anndeede. So aɗa golla ɗii golleeji, ɓannginan yimɓe hoore maa.

⁵Tawi fay miɲiraaɓe makko ɓee duu ngoonɗinaali mo.

⁶Iisaa wii ɓe: —Wakkati am waraali tafon, kaa onon, wakkati fuu yo wakkati mon.

⁷Yimɓe aduna mbaawaa waɲude on, kaa miin eɓe mbaɲi kam, sabi miɗo seedii golleeji maɓɓe ɗii moƴƴaa.

⁸Onon, njehee kawroyee e oon iidi. Miin, mi yahataa hawroyde e oon iidi sabi wakkati am yottaaki tafon.

⁹O haalani ɓe ɗum tan, o heddii Galili.

¹⁰Nde miɲiraaɓe Iisaa ɓee njahunoo hawroyde e iidi oo ndee, Iisaa duu yehii ton, kaa o ɓannginaali hoore makko, o suuɗi.

¹¹Hooreeɓe Yahuudiyankooɓe ana tewta mo ley jamaa iidi oo, ana mbiya: —Hoto o woni?

¹²Yimɓe heewɓe ana liddondira haala makko. Yoga ana wiya: —O neɗɗo lobbo! Woɓɓe ana mbiya: —Wanaa dee, o majjinoowo yimɓe.

¹³Kaa fay gooto suusaali haalde haala makko faa nanee, sabi eɓe kula hooreeɓe Yahuudiyankooɓe.

¹⁴Nde iidi oo feccirta, tawi Iisaa fuɗɗii waajaade ley Suudu Dewal Mawndu nduu.

¹⁵Yahuudiyankooɓe kaaynaa sanne, ɓe mbii: —Hono o waawiri dewte, kanko mo janngaali?

¹⁶Iisaa jaabii ɓe: —Waaju mo mbaajotoo-mi oo, iwataa e am. To nelɗo kam oo mo iwranta kam.

¹⁷So neɗɗo muuyii gollude sago makko, annditan so konngi am ɗii to Laamɗo iwri, naa so waajuuji am ɗii e am iwi.

¹⁸Oon baajortooɗo hiini hoore mum, hoore mum teddinta. Kaa oon teddinoowo nelɗo ɗum, goonga haalata, ooɲaare walaa e mum.

¹⁹Wanaa Muusaa hokki on Sariya naa? Kaa fay gooto e mon jokkaali Sariya. Ko saabii so oɗon tewta warde kam?

²⁰Yimɓe ɓee njaabii mo: —Aan, a laddaaɗo. Homo ndaarata warde ma?

²¹Iisaa jaabii ɓe: —Golle gooto tan ngollu-mi, on fuu, on kaaynaama.

²²Muusaa yamiri on taadagol. Taweede to njaatiraaɓe mooɗon ɗum iwrii fuu, wanaa to Muusaa. Oɗon taada neɗɗo fay ɲalaande fowteteende.

²³So nii neɗɗo ana taadee ɲalaande fowteteende pati on luuttu Sariya Muusaa, koɗum tikkiranton kam saabe mi sellinii neɗɗo kuurɗo ɲalaande fowteteende?

²⁴Pati cariree no njiiru-ɗon, cariree goonga.

²⁵Yoga e yimɓe Urusaliima mbii: —Wanaa oo woni mo ɓe tewtata warde oo naa?

²⁶Omo nii darii, omo waajoo hakkunde jamaa oo. Ɓe mbiyaali mo fay huunde. Tama mawɓe ɓee cellinii kanko woni Almasiihu oo jaati?

²⁷Oo ɗoo kaa, eɗen anndi ɗo iwata, kaa nde Almasiihu oo ana wara, fay gooto anndataa to iwrata.

²⁸Tawi Iisaa ana waajoo ley Suudu Dewal Mawndu nduu. O haali faa toowi, o wii: —Oɗon anndi kam, oɗon anndi ɗo iwan-mi? Wanaa miin waddi hoore am. Nelɗo kam oo yo goongaraajo. Onon, on anndaa mo.