Yuhanna 6:56-69

⁵⁶Neɗɗo fuu ɲaamɗo tew am so yari ƴiiƴam am, ɲiiɓii e am, mi ɲiiɓii e mum.

⁵⁷Baabiraaɗo nelɗo kam oo yo guurɗo. E makko nguuru-mi. Hono non ɲaamɗo kam fuu wuurirta e am.

⁵⁸Kayru woni ɲaamdu iwrundu dow kammu: ndu waldaa e ndu njaatiraaɓe mon ɲaamunoo so maayii nduu. Ɲaamɗo nduun ɲaamdu, wuuran faa abada.

⁵⁹Ɗii waajuuji Iisaa waajinoo ley waajordu Kafarnahum.

⁶⁰Nde ɓe nannoo ɗi ndee, heewɓe e taalibaaɓe makko mbii: —Ɗii waajuuji njoorii sanne. Homo waawi hettinaade ɗi?

⁶¹Iisaa humpitii ley becce mum taalibaaɓe mum ɓee ana ŋermitoo e majjum, wii ɓe: —Ɗum huɓindanaaki on naa?

⁶²Ndennoo so on njii Ɓii Neɗɗo ŋabbitii to wonnoo too, hono ngaɗaton?

⁶³Ruuhu, kaɲum hokkata nguurndam, kaa terɗe ɓii-aadama nafataa fay huunde. Haalaaji ɗi kaalanan-mi on ɗii, kaɲum woni ruuhu, kaɲum woni nguurndam.

⁶⁴Ana e mon ɓe ngoonɗintaa. Nde wonnoo Iisaa ana anndi gila e puɗɗooɗe ɓe ngoonɗintaa ɗum ɓee, kaɲum e jammbotooɗo ɗum oo.

⁶⁵O ɓeydi hen: —Ɗum saabii so mbii-mi on: fay gooto waawaa warde e am so Baabiraaɗo hokkaali ɗum no warda.

⁶⁶Caggal ɗum, heewɓe e taalibaaɓe makko ɓee mbitti, ŋootti jokkude e makko.

⁶⁷Nden Iisaa wii sappo e ɗiɗon ɓee: —Onon duu, oɗon njiɗi wittude naa?

⁶⁸Simon Piyeer jaabii mo: —Moobbo, to homo min njahata? Ɗo maa ɗoo haalaaji guurnooji neɗɗo nguurndam nduumiiɗam ngoni.

⁶⁹Min ngoonɗinii, miɗen anndi a Ceniiɗo Laamɗo.