Yuhanna 6:1-14

¹Caggal ɗum, Iisaa lummbi weendu Galili, wiyeteendu Tiberiyas.

²Jamaa keewɗo ana jokki e makko sabi ɓe njii kaayɗe ɗe o waɗunoo nde o sellinnoo ɲawɓe ɓee ndee.

³Iisaa ŋabbi dow waamnde haayre, jooddii ton e taalibaaɓe mum.

⁴Tawi iidi Yahuudiyankooɓe biyeteeɗo Paska oo ɓadike.

⁵Iisaa hunci hoore, soynii jamaa keewɗo ana fa'i ɗum. O wii Filipa: —Hoto coodaten ɲaamdu ko ɲamminta ɓee fuu?

⁶Tawi o biiruɗo non tan faa o nana ko Filipa jaabotoo, sabi omo anndi ko o faandii gollude.

⁷Filipa jaabii mo: —Buuru teemeɗe ɗiɗi cardi heƴataa ɓe faa gooto e maɓɓe fuu heɓa hen seeɗa.

⁸Taalibbo makko goɗɗo, biyeteeɗo Andire miɲii Simon Piyeer, wii mo:

⁹—Annii, suka gorko gooto ana jogii buuruuje joy e liɗɗi ɗiɗi, koɗum ɗum nafirta yimɓe heewɓe hono ɓee?

¹⁰Iisaa wii: —Mbiyee ɓe njooɗoo! Nde wonnoo nokku oo ana heewi huɗo, ɓe njooɗii. Eɓe poti e ujunaaji joy gorko.

¹¹Iisaa ɓami buuruuje ɗee, yetti Laamɗo, hokki taalibaaɓe ɓee. Ɓeen ndokki jooɗiiɓe ɓee. Hono non liɗɗi ɗii duu. Gooto fuu heɓi ko haajaa.

¹²Nde ɓe kaarnoo ndee, Iisaa wii taalibaaɓe mum: —Ndeentinee kedde ɗee pati fay huunde mursee.

¹³Ɓe kawrini kedde taƴe buuruuje joy ɗe ɲaamnooɓe ɓee keddi ɗee, ɗe kebbini cagiije sappo e ɗiɗi.

¹⁴Nde yimɓe ɓee njiinoo haaynde nde Iisaa golli ndee, mbii: —Kanko jaati woni Annabaajo cappanooɗo ana wara e aduna oo.