Yuhanna 4:12-47

¹²Aan, aɗa ɓuri njaatigi amen Yaakuuba dokkuɗo min ɓunndu nduu oo teddude naa? Kanko e ɓiɓɓe makko e daabaaji makko fuu, ɓe njarii e mayru.

¹³Iisaa jaabii mo: —Neɗɗo fuu jarɗo ɗam ndiyam ɗomɗan kasen,

¹⁴kaa jarɗo ndiyam ɗam ndokkan-mi ɗum ɗam fuu, ɗomɗataa abada. Sabi ndiyam ndokkan-mi ɗum ɗam laatanto ɗum ndiyam iloojam nguurnoojam ɗum nguurndam nduumiiɗam.

¹⁵Debbo oo wii: —Giɗo, hokkam ɗam ndiyam pati mi ɗomɗa kasen, sako mi warta ƴoogude ɗoo kasen.

¹⁶Iisaa wii mo: —Yaa noddoy jom suudu maa, ngardon!

¹⁷Debbo oo jaabii mo: —Mi walaa jom suudu. Iisaa wii mo: —A haalii goonga ko mbii-ɗaa a walaa jom suudu koo.

¹⁸A ɓamanooma worɓe njoyon. Gorko ngondu-ɗaa jooni oo duu, wanaa jom suudu maa. A haalii goonga.

¹⁹Debbo oo wii mo: —Moobbo, laaɓanii kam a annabaajo.

²⁰Njaatiraaɓe amen ndewii Laamɗo e ndee waamnde haayre, kaa onon Yahuudiyankooɓe, oɗon mbiya to Urusaliima too Laamɗo haani reweede.

²¹Iisaa wii mo: —Banndam debbo, jaɓu ko kaalanan-maa-mi koo: wakkati waran, mo ndewaton Baabiraaɗo tawee wanaa e ndee waamnde haayre, wanaa e Urusaliima.

²²Onon Samariyankooɓe, oɗon ndewa ko on anndaa, kaa minen Yahuudiyankooɓe, ko min anndi min ndewata, sabi kisindam to Yahuudiyankooɓe iwrata.

²³Wakkati ana wara, mo yottike jaati, nde rewirooɓe Laamɗo goonga ɓee ndewirta ɗum Ruuhu e goonga. Hono ɓee rewooɓe Baabiraaɗo ndaarti.

²⁴Laamɗo yo Ruuhu. Rewooɓe mo ɓee kinaa ndewira mo ruuhu e goonga.

²⁵Debbo oo wii: —Miɗo anndi Cuɓaaɗo biyeteeɗo Almasiihu oo yo garoowo. Nde o warii, o humpitan min kulle fuu.

²⁶Iisaa wii mo: —Miin kaaldoowo e maa oo woni kanko.

²⁷E dow ɗum taalibaaɓe makko ɓee njottii. Ko Iisaa haaldata e debbo oo koo haaynii ɓe, kaa fay gooto e maɓɓe wiyaali ɗum: «Ko ndaartataa? Ko kaaldataa e makko?»

²⁸Nden debbo oo yoppi mbulku mum ton, wirfitii ngeenndi haalanoyi yimɓe, wii:

²⁹—Ngaree ƴeewee gorko kaaltanɗo kam ko ngannoo-mi fuu annii, yalla wanaa kanko woni Almasiihu?

³⁰Ɓe njehi ƴeewoyde mo.

³¹Oon wakkati, taalibaaɓe ɓee ndaardi mo, ana mbiya: —Moobbo, tiinna ɲaamu!

³²O jaabii ɓe: —Miɗo jogii ko mi ɲaama ko on anndaa.

³³Taalibaaɓe ɓee ana lamndondira: —Ɗum nee, won gaddanɗo mo ko ɲaametee naa?

³⁴Iisaa wii ɓe: —Ɲaamdu am yo waɗude sago nelɗo kam oo e timminde golle makko.

³⁵Onon, oɗon mbiya: «Faa hannde lebbi nay so kettal wara.» Kaa miin, miɗo wiya on: tippee gite mon, ƴeewee gese ɗee fuu ɓenndii, ɗe njonii hetteede.

³⁶Kettuɗo heɓan ngeenaari, mooɓtana ɲamri ndii nguurndam nduumiiɗam, yalla aawuɗo e kettuɗo ana ceyodoo.

³⁷Ɗum tabintinta banndol biyoowol: «Gooto ana aawa, goɗɗo ana hetta.»

³⁸Mi nelii on kettoyon nga on tampanaali. Woɓɓe tampi. Onon, on ndaamitike e tampere maɓɓe.

³⁹Samariyankooɓe heewɓe ley ndee ngalluure ngoonɗinii Iisaa saabe haala debbo ceettiiɗo so wii: «O haaltanii kam ko ngaɗunoo-mi fuu.»

⁴⁰Nde Samariyankooɓe ɓee njottinoo Iisaa ndee, ndaardi mo o faɓɓana ɗum'en. O waɗi ɗon balɗe ɗiɗi.

⁴¹Yimɓe heewɓe ngoonɗini mo kasen faa ɓuri no arannde nii saabe konngol makko ngol.

⁴²Ɓe mbii debbo oo: —Jooni, wanaa saabe haalaaji maa ɗii tan min ngoonɗiniri. Ko min ngoonɗiniri dee, minen e ko'e amen, min nanii konngol makko, min anndi kanko jaati woni kisinoowo aduna oo.

⁴³Caggal balɗe ɗiɗi ɗee, o iwi ton, o yehi Galili.

⁴⁴Kanko e hoore makko o seettinoke: «Annabaajo teddintaake e ley suudu baam mum.»

⁴⁵Nde o yottinoo Galili ndee, Galilinkooɓe njaɓɓorii mo juuɗe ɗiɗi, sabi kamɓe duu ɓe njehiino iidi Urusaliima, ɓe njiino ko o gollunoo ley iidi oo koo.

⁴⁶Nden Iisaa warti Kaana ley leydi Galili, ɗo mo waylitinnoo ndiyam o waɗi ɗam peguujam ɗoo. Howruujo kaananke mo ɓiyum sellaa ana ley Kafarnahum.

⁴⁷Nde howruujo oo nannoo Iisaa iwrii Yahuudiya wartii Galili ndee, yehi to Iisaa, ndaardi ɗum jippoo sellinoya ɓiyiiko kaɓanoowo yonki.