Yuhanna 2:5-19

⁵Inniiko wii gollooɓe ɓee: —Ko o yamiri on fuu, ngaɗon.

⁶Kaaƴe jeegom, asiiɗe faa laatii hono pakaaje mawɗe ɗo Yahuudiyankooɓe lootetee faa laɓɓinee banngal diina, ana ngonnoo ton. Honde fuu ana naanna bulki sappo ndiyam.

⁷Iisaa wii ɓe: —Kebbinee pakaaje ɗee ndiyam. Ɓe kebbini ɗe faa ɗe keewi.

⁸O wii ɓe: —Jooni kaa, ɲeɗee naɓanee hooreejo kuurtungu oo. Ɓe naɓi.

⁹Nde hooreejo oo meeɗunoo ndiyam mbaylitaaɗam peguujam ɗam ndee, annditaali to ɗam ittaa. Kaa gollooɓe ɲeɗuɓe ndiyam ɗam ɓee ana anndi. O noddi jommbaajo gorko oo,

¹⁰o wii ɗum: —Yimɓe fuu peguujam mbelɗam mboowi adoraade. Nde yimɓe cigirii, nden ɗam welaa ɗam yaretee. Kaa aan, aɗa resi mbelɗam ɗam faa jooni.

¹¹Nii Iisaa golliri haaynde mum aranndeere ley ngalluure Kaana ley leydi Galili. O ɓanngini baawɗe makko, taalibaaɓe makko ɓee ngoonɗini mo.

¹²Caggal ɗum, o iwi Kaana, o yehi ngalluure wiyeteende Kafarnahum, kanko e inniiko e miɲiraaɓe makko e taalibaaɓe makko. Ɓe paɓɓi ton balɗe seeɗa.

¹³Nde iidi Yahuudiyankooɓe biyeteeɗo Paska oo ɓadinoo ndee, Iisaa ŋabbiti Urusaliima.

¹⁴O tawi ley daalaare Suudu Dewal Mawndu nduu julaaɓe ga'i e baali e soottooɓe buugaaji, kaɲum e weccooɓe kaalisi ana njooɗii.

¹⁵O nanngi ɓoggi, o sowi, o ribbi ɓe fuu ɓe njalta Suudu Dewal Mawndu nduu, kamɓe e ga'i maɓɓe e baali maɓɓe. O sankiti kaalisi weccooɓe, o hippi taabe maɓɓe.

¹⁶O wii soottooɓe buugaaji ɓee: —Ittee ɗum ɗoo, pati ngaɗee suudu Baabiraaɗo am nduu soottirdu.

¹⁷Taalibaaɓe makko ɓee miccitii ko Binndi ɗii mbii koo: «Jilli suudu maa laatanike kam sugulla.»

¹⁸Nden hooreeɓe Yahuudiyankooɓe mbii mo: —Haaynde honde kollataa min aɗa foti waɗude ko ngaɗ-ɗaa koo?

¹⁹Iisaa jaabii ɓe, wii: —Ngurjinee Suudu Dewal nduu. So on ngurjinii ndu, on njiyan miɗo mahitoo ndu ley balɗe tati.