Yuhanna 20:2-18

²O dogi, o yehi to Simon Piyeer e taalibbo mo Iisaa horsinnoo oo, o wii ɓe: —Ɓe ittii Moobbo oo e yanaande ndee, mi anndaa fuu ɗo ɓe ngaɗi mo.

³Piyeer e taalibbo oo njalti, njehi to yanaande too.

⁴Eɓe ndoga ko ɓe mbaawi fuu. Taalibbo oo daɗi Piyeer, adii ɗum e yanaande ndee.

⁵O yuurnii, o yii kasanke oo yo ɓolo, kaa o naataali.

⁶Simon Piyeer, kaɲum kaa yottii fuu, naati, tawi kasanke oo ana jooɗii.

⁷Pilkol pilkanoongol e hoore Iisaa ngol tawdaaka e kasanke oo, ngol tawaama engol sowii feere maggol.

⁸Nden taalibbo ardinooɗo warde oo, kaɲum duu naati, yii, goonɗini.

⁹Tawi ɓe paamaano tafon ko Binndi ɗii mbii koo, Iisaa yo immitintooɗo.

¹⁰Caggal mum, taalibaaɓe ɗiɗon ɓee kooti to mum'en.

¹¹Kaa Mariyama ana darii ɗo damal yanaande ɗoo, ana woya. O turii, o yuurnii ley yanaande ndee.

¹²O yii malaa'ika'en ɗiɗon ɓe kaddule daneeje ana njooɗii ɗo tew Iisaa oo resanoo ɗoo, gooto ɗo hoore ɗoo, goɗɗo oo to koyɗe too.

¹³Malaa'ika'en ɓee mbii mo: —Banndam debbo, koɗum mboyataa? O jaabii ɓe: —Ɓe ittii Moobbo am ɗoo, mi anndaa fuu to ɓe ndesi ɗum.

¹⁴Nde o haalnoo kaa haala ndee, o yeeccitii, o yii Iisaa ana darii, kaa o annditaali ɗum.

¹⁵Iisaa wii mo: —Banndam debbo, koɗum mboyataa? Homo tewtataa? Mariyama miili golloowo nokku oo haaldata e mum, wii oon: —Giɗo, so aan itti mo ɗoo, haalanam ɗo ndesu-ɗaa mo, faa mi ɓamta mo.

¹⁶Iisaa wii mo: —Mariyama! O yeeccitii, o wii e ibaraninkoore: —Rabbunii! (Ɗum woni «Moobbo».)

¹⁷Iisaa wii mo: —Pati memam, sabi mi ŋabbitaali to Baabiraaɗo am tafon. Yaa to sakiraaɓe am, mbiyaa ɓe mi ŋabbitan to Baabiraaɗo am, Baabiraaɗo mon, Laamɗo am, Laamɗo mon.

¹⁸Mariyama mo Magdala martinoyi taalibaaɓe ɓee kumpa, wii ɓe: —Mi yii Moobbo oo. O haaltani ɓe ko Iisaa haalani mo koo fuu.