Yuhana 7:25-51

²⁵Among mine anan Urshalima woro, “Na amere ulengene na idin pizuru imolu ba?

²⁶Yeneng, adin liru kanang, ana iworoge iyang ba. Na umaso nafo adidya bite yiru amere Kriste, na nanere ba?

²⁷Arik yiru kikanga na unit ulele na nuzu ku, asa Kristi nda, na imong ma yinnu kikanga na ana nuzu ba.”

²⁸Yesu uni wa ghatin liwui kan nanya kutii nlira, ndursuzu kiti a woro, “Anung vat yirue, iyuro kikanga nan nna nuzu ku; na nna dak bara litinin ba, ame ulenge na ana tuyi unan kidegenari, ulenge na iyirughe ba.

²⁹Meng yirughe, bara nna dak unuzu kiti mere, amere na tuyi.

³⁰Icizina nworu i kifoghe, na umong nkifoghe ba bara na kubi me wadi kusa da ba.

³¹Nani, among gbardang nanya ligozin wa yinin nighe. I woro “Asa Kristte nda, ama su imon izikiki ikata ilenge na unit ulele nsuwa?”

³²Afarisawa lanza ligozin nanite din belu ulenge ulirue litin Yesu, adidya na Yahudawe nin na Farisawa to a dugari idi kifoghe.

³³Yesu tunna a woro, “Ndu nin kubiri bat in yita ligowe nan ghinu, Nma nin du kitin lenge na ana tuyi.

³⁴Ima pizirui na ima yeni ba, kiti kanga na nma du, na yinnu idak bak.”

³⁵Ayahudawa tunna nbelu nati mine, “Unit ulengene madu weri ki kanga na arik ma yinnu upizirughe ba? Sa ama du kiti na Helenawari, alenge na isosin buu adi dursuzo nani ti Helenawa?

³⁶Uyapin uliruiari ulele na a belle, 'ima piziri, ana ima yeni ba; kiti kanga na nma du, na anung ma yinnu udake ba.'?”

³⁷Nengene liri nimalin idi udya, Yesu wa fita asu uliru nin liwui kang, aworo,”Andi umong dinin kotu nayi na adak kitining ada sono.

³⁸Ulenge na ayinna nin mi nafo na uliru Kutelle na belli, unuzu nanya me, igawan nmyen nlai ma cun ku.”

³⁹Nani awa su uleli ulire litin Ruhu, ulenge na ale na iyinna ninghe ma seru; na iwadi isa na uruhe ba, bara na iwa di isa ta Yesu ku gongong ba.

⁴⁰Among ligozin, na iwa lanza uleli ulirre, iworo, “Kidegene ulengene unan liru nin nu Kutelleari.”

⁴¹Among woro, “Ulengenere Kristi.” Among tutung woro, “Iyangha, Kristi ma dak unuzun Galiliaria?

⁴²Na uliru Kutelle na woro Kristi ma dak unuzu fimusun Dauda in Baitalami, ka gbiri kanga na Dauda wa duku?”

⁴³Usalin yinnu nin nati fita nanya ligozighe bara ame.

⁴⁴Among mine wa dinin su ikifoghe, a nan umong mine tardaghe ucara ba (na umong mine kifoghe ba.)

⁴⁵Adugare tunna i kpilla kiti na didya na Yahudawa nan na Farisawe, inung woro nani, “Iyaghari nta na ida ningheba?”

⁴⁶Adugare kawa nani, iworo, “Na umong nsa su uliru nafo ulengene ba.”

⁴⁷Afarisawa kawa nani, iworo “Anung wang iwultun minua?

⁴⁸Umong nanya na Gowe sa Afarisawa nyinna ninghe?

⁴⁹Linin ligozin longo na liyiru uduke ba, ita nani unuu.”

⁵⁰Nikodimo woro nani, (Umong na awa mang dak kitin Yesu, ame wang ku Farisawari),

⁵¹“Uduka bite din suzu unit ushara a udutu sa ulanzu kitime iyinnin imong ilenge na adin sua?”