Yuhana 5:16-43

¹⁶Bara ilenge imone adidya na Yahudawwe wati Yesu ku aneo, bara na awa su ilenge imone liri na Sabbat.

¹⁷Yesu woro nani, “Ucif nin di katwa nene wang, meng ndi katwa.”

¹⁸Bara nani a Yahudawa wa pizuru tibau vat nworu imolughe, na bara ananza Asabbat cas ba, bara akuru adi yicu Kutelle Ucifme. Ayira litime urum nin Kutelle.

¹⁹Yesu kawa nani aworo, “Kidegenere na gono wasa asu imonimong litime ba, se ilenge na ayene Ucife din suzu, gono asa su inmusu nileli imone wang.

²⁰Bara Ucife dinin sun Saune, tutung amini din dursuzughe imon ilenge na ame din suzu, ama kuru adursoghe imon ididya ilenge na i katting ilengene bara anung nan se uzikpu.

²¹Nafo na Ucife na fiza anan kul, aniza nani ulai, nanere wang Usaune ma kuru aniza alenge na ame nfere ulaiye tutung.

²²Nafo na Ucife din su umong ushara ba, ana nani usaune ushara vat.

²³Bara vat nan zazina Usaune nafo na idin zazunu Ucife. Ulenge na adin zazunu Usaune ba, na adin zazunu Ucife na atughe ba.

²⁴Kidegenere, ulenge na alanza uliru nighe, aminin yinna nin lenge na ana tuuyi adi nin lai sa ligang ana ama so nca nkulba. Ana kafina ukul udu nanya nlai.

²⁵Kidegenere ndin bellu minu, kubi din cinnu nene wang kuda, na anan kul ma lanzu liwui ning, Usaun Kutelle, inung alenge na ilanza ma ti ulai.

²⁶Nafo na Ucife di nin lai unlitime, nanere wang ana ni Usaune ayita nin lai unlitime.

²⁷Ucife uni nani Usaune likara nsu nshara bara na ame Usaun nnitari.

²⁸Na iwa se uzikpu nanya nilenge imone ba, bara kubi din cinu kongo vat na lenge na idi nisek ba lanzu liwui me,

²⁹tutung ima nuzu udas: alenge na inasu imon icine ima fitu iti ulai, a inung alenge na ina su imon inanzang, ima fitu ufitun shara.

³⁰Bara litinin nwasa nsu imon ba, nafo na ndin lanzu, nanere ndin su ushara, tutung ushara ning ucinari, bara na ndi su un kibinai ning ba, se kin lenge na ana tuuyi.

³¹Andi nma su uliru litining usaning, na uliru nighe ma yitu kidegen ba.

³²Umong duku na adin su uliru litinighe, tutung meng yiru ulire na adin bellu litinighe kidegenari.

³³Ina tuu kitin Yuhana, amini na su uliru un kidegen.

³⁴Vat nani, uliru ulenge na ina seru na kitin nnitari ba. Nbelle ile imone inan se utucu.

³⁵Yuhana wadi ulari na uwadin lii uta kiti kanang, anung ani wadi nin su i yita nin liburi libo nin kubiri kongo na idin yenje.

³⁶Vat nani ushada ulenge na ndimung, ukatin un Yuhana, bara katwa kane Ucife na nii nmalu, katwa ka na ndin su, nna ushaida litining nwo Ucifari na tuyi.

³⁷Ucife, ulenge na ana tuyi litime ana ni ushada litining. Na isa lanza liwuime ba, sa iyene ukama me ba.

³⁸Na uliru me du nanya mine ba, bara na ina yinin nin lenge na ana tuyi ba.

³⁹Idin pizuru uliru ulau nanya niyerte, idin yenju nafo nanya ninnere ima se ulai, unin uliru ulau urum unere nani ushada litining,

⁴⁰ana anung dinin su idak kiti nin inan se ulai ba.

⁴¹Na ndin sesu uzazinu kiti nanit ba.

⁴²Bara inyiru na idi nin su Kutelle nanya nibinayi mine ba.

⁴³Nna dak nanya lissa Ncif ninghari, inani na ina seri ba. Andi umong ma dak nanya lissa me ima serughe.