Yuhaana 5:26-43

²⁶Hande no Baaba laatorii ɓulirde yonki, hande nun o hokkii Ɓiɗɗo bo laatoo ɓulirde yonki.

²⁷O hokkii mo baawɗe hiitaago, gam o laati nun Ɓii neɗɗo.

²⁸To ɗum haaynoo on. Wakkati waran, de maayɓe wonuɓe der caabeeje nanata daane makko,

²⁹ɓe burtoo. Waɗuɓe ko wooɗi, finta, heɓa yonki, waɗuɓe ko halli finta, hiitee.»

³⁰«Min e hoore am, walaa fu ko baawumi waɗugo. Ko nanumi, kiitortoomi. Kiita am e foonnitii, gam mi tokkataa sago am, sago lilɗo am nun tokkumi.

³¹To mi seedanike hoore am, seedaaku am nootataake.

³²E woodi goɗɗo ceedantooɗo am. Mii anni seedaaku makko, ko o seedantoo am laati nun gooŋa.

³³Onon, on lilii himɓe to Yuhaana, o seedike gooŋa.

³⁴Min, mi bukaaka seedaaku neɗɗo, amma mi batii ka gam kison.

³⁵Yuhaana laatike fitilla kuɓɓoowa, jaaynoowa. On jaɓii welweltugo wakkati seɗɗa e jayŋol makko.

³⁶Min, mii woodi seedaaku ɓurŋu ŋu Yuhaana manŋu. Golle ɗe Baaba yowanimmi mi waɗa, golle ɗe gaɗanmi ɗen nun seedantoo am no Baaba nun lilimmi.

³⁷Baaba liluɗo am, kanko e hoore makko seedanii am. Abada on nanay daane makko, abada on ji'ay mo.

³⁸Batu makko wonday e mooɗon, gam on goonɗinay mo o lili.

³⁹Oon biɗitoo Dewte gam oon miiji ɗe kokkan on yonki tabitiiki. Kanje seedantoo am.

⁴⁰Amma, on jaɓay warugo to am gam keɓon yonki.

⁴¹Diga e himɓe bane keɓammi tedduŋal am,

⁴²amma mii anni on, mii anni yidde Alla walaa e mooɗon.

⁴³Min, mi warii e inne Baaba am, on jaɓɓaaki am. Amma to goɗɗo wardii inne mum, on jaɓɓoto ɗum.